web counter
LEXO PA REKLAMA!

SHKARKO APP

App Store
Google Play

E fundit!

x

Humb shikimin e paralizohet pas aksidentit, prokurori mbyll dosjen

7 Dhjetor 2022, 22:17, Denoncim CNA
Humb shikimin e paralizohet pas aksidentit, prokurori mbyll dosjen
Foto ilustruese

“Stop” ishte në aksin nacional Kamëz-Shkodër në afërsi të Valiasit, pasi qytetari Niko Qarkaj tregoi se në 7 Shkurt 2020, babai i tij është nisur për në punë, në një fabrikë plastike në Valias ku ishte roje nate.

Të nesërmen i ati nuk është kthyer në shtëpi dhe Niko ka dalë ta kërkojë, por ka gjetur vetëm biçikletën të mbështetur në një shtyllë dhe babain në spital.

“Në datën 7 Shkurt 2020 babai ka qenë afër shtëpisë, por punonte si roje nate në një fabrikë plastike në këtë drejtim. Gjithmonë bënte turnin e natës. Kontaktova me doktorin dhe më tha është në gjendje shumë të rëndë. Kishte pjesë ajri në tru, thyerje kafke, mpiksje gjaku. E morëm vesh me vonesë punën e shikimit. I thosha shih, na sheh, thotë jo. Një okulist e pa dhe tha që i kishte ik shikimi në zero”, u shpreh djali.

Doktorët i thanë se dëmtimet ishin të konsiderueshme dhe ata e kishin quajtur aksident.

“Ka qenë shumë i fortë fizikisht, mos me ta marrë mendja që ka qenë 80 vjeç. Nuk ka pasur asnjë lloj shqetësimi, nuk ka marrë ilaçe gjithë jetën e tij. Asnjë lloj ilaçi ka qenë shumë i fuqishëm. Nga doktorët dhe nga pasojat e babait u mendua se është aksident me mjet, jo i rënë vetë nga biçikleta”.

Niko bëri kallëzim në polici, por nuk di të thotë se çfarë ndodhi më pas.

“Pas 3 vitesh nuk kam përgjigje nga prokuroria dhe nga policia për babain tim, se ka ngelur i paralizuar nga aksidenti. Unë kërkoj të zbardhet e vërteta”, u shpreh denoncuesi.

“Stop” foli vetëm me të moshuarin Pal Qarkaj, por ai nuk mban mend shumë gjëra, pasi është në karrige me rrota e ka humbur plotësisht shikimin.

Pal Qarkaj: Dhimbje kam këtu. Kjo këmbë është prej këtu e poshtë nuk e dëgjoj që e kam timen fare.

Gazetarja: Ke qenë në punë?

Pal Qarkaj: Po.

Gazetarja: Çfarë pune bëje?

Pal Qarkaj: Roje, roje fabrike.

Gazetarja: Natën apo ditën?

Pal Qarkaj: Natën.

Gazetarja: Me çfarë shkoje në punë?

Pal Qarkaj: Me biçikletë.

Gazetarja: Mban mend çfarë ka ndodhur në datën 7 Shkurt 2020?

Pal Qarkaj: Jo.

Gazetarja: Kush të ka gjetur tek spitali?

Pal Qarkaj: Më kanë kërkuar, nuk më kanë gjetur. Ka ardhur djali dhe më ka gjetur.

Gazetarja: Çfarë problemi keni me sytë?

Pal Qarkaj: Nuk shoh fare unë.

Gazetarja: Nuk di nëse të ka përplasur ndonjë makinë apo je rrëzuar nga biçikleta?

Pal Qarkaj: Nga biçikleta nuk jam rrëzuar unë.

Gazetarja: Si e mban mend veten para 3 viteve?

Pal Qarkaj: Shumë mirë. Edhe 4 muaj bëhen 3 vjet.

Pal Qarkaj është gjetur nga dy persona të tjerë dhe është dërguar në spital. Ndërkohë pasi djali i tij ka bërë kallëzimin, policët kanë ardhur dhe kanë konstatuar biçikletën të lidhur në një shtyllë. Dëshmitë e dy dëshmitarëve tregojnë që Pal Qarkaj është gjetur i shtrirë përtokë dhe është marrë e shoqëruar përtokë. Biçikleta është prekur nga dikush tjetër dhe është mbështetur në shtyllë.

Pasi është bërë kallëzimi, materialet janë dërguar në Prokurori. Nga ana e prokurorit të çështjes është regjistruar një procedim penal për shkelje të rregullave të qarkullimit rrugor, por përderisa është caktuar si aksident duhej të kishte edhe një tjetër vepër penale, largimi nga vendi i ngjarjes.

“Ky është vendi i ngjarjes, por për prokurorin nuk ka qenë e nevojshme një procesverbal i shoqëruar dhe me skemën e ngjarjes”, raporton gazetarja e “Stop”.

Përveç kësaj, prokurori nuk ka marrë kamerat e sigurisë dhe nuk ka kërkuar në një perimetër më të gjerë. Biçikletës po ashtu nuk i është bërë asnjë ekspertizë.

Megjithatë pavarësisht të gjitha këtyre mangësive, prokurori i çështjes, në përfundim e ka pezulluar dosjen pa autor./tvklan.al





Lajmet e fundit nga