“Do ta vras”, i çon lopët te dera/ Sherri mes fqinjëve në Vlorë

21 Nëntor 2025, 21:07, Denoncim CNA

“Do ta vras”, i çon lopët te dera/ Sherri mes

Emisionin “Stop” në Tv Klan këtë të premte, 21 nëntor, ndodhet në Sherishtë të Vlorës, pasi Niko Salaj ankohet për komshiun e tij, Nikolla Shakaj i cili ka ndërtuar një stallë lopësh brenda oborrit të shtëpisë, vetëm 4 metra larg banesës së tij.

Era dhe ndotja janë bërë aq të forta sa, sipas Nikos, aty nuk jetohet më. Niko e ka diskutuar fillimisht me fqinjin, por përgjigja ka qenë zero.

“Tani jam 55 vjeç, këtu kam lindur, kam 24 vjet që jam kthyer nga kurbeti, kam investuar, por problemin e higjienës e kam pasur që kur kam ardhur. Nikolla Shakaj ka 12 krerë lopë, në vijë ajrore 6 metra, rruga është 3 metra, është era e keqe, urina e përditshme dhe më shkakton ndotje edhe nuk mbaj dot pastër. Kam ardhur nga kurbeti për të investuar këtu, jam veti i shtatë. Gjitha njohurinë dhe idenë që mora në kurbet po e përcjell këtu në Shqipëri, por ndotja është e papranueshme. Nuk jetohet në këtë gjendje”, tha denoncuesi.

Më pas ka vënë në dijeni kryeplakun, administratorin, Bashkinë Vlorë, AKM-në dhe ISHP-në. Të gjitha institucionet ia kanë kaluar kompetencën Bashkisë, e cila në mars doli me vendimin për largimin e bagëtive dhe pastrimin e zonës.

Por deri më sot asgjë s’ka ndryshuar. Stalla, sipas tij, nuk plotëson as kushtet higjieno-sanitare dhe as distancat minimale.

“I thashë që të gjenim një zgjidhje pa iu drejtuar institucioneve, më tha që nuk i heq. Tani u jap drejtuar institucioneve. Policia Bashkiake, ka ardhur e ka verifikuar gjendjen dhe më tha që do të marrë masa. Bashka e Vlorë i dërgoi shkresë që të largonte lopët dhe pastronte zonën, por nuk është bërë asnjë gjë. Nuk e di tani, vetëm nga ju pres një zgjidhje përfundimtare”, shtoi qytetari.

Pala tjetër, Sherife Shakaj thotë se do ta heqë në fund të dhjetorit, një premtim që sipas Nikos, është bërë shumë herë dhe nuk është mbajtur. Në vend të zgjidhjes, ka marrë vetëm tone kërcënuese.

“Do marr masat dhe do e bëj. Deri në fund të dhjetorit unë do bëj stallën. Unë nuk kam lekë të bëj stallën. Unë do kaloj lopët këtu. Të betohem për katër fëmijët që do e vras”, tha Sherife Shakaj./ Tvklan