“Bateria e ujit” zvicerane, do të jetë një nga burimet e rinovueshme energjetike kryesore në Europë

7 Korrik 2022, 10:00, Blog Rebecca Ann Hughes

“Bateria e ujit” zvicerane, do të jetë një nga

Një “bateri uji” e aftë të ruajë një sasi energji elektrike të barasvlershme me 400.000 bateri makinash elektrike, do të nisë që të funksionojë në Zvicër javën e ardhshme. Centrali energjetik që punon me ujin e depozituar më parë, është ndërtuar në një shpellë nëntokësore në kantonin zviceran Valais.

Me aftësinë për të ruajtur dhe gjeneruar sasi të mëdha të energjisë hidroelektrike, kjo lloj baterie revolucionare do të luajë një rol të rëndësishëm në stabilizimin e furnizimit me energji elektrike në Zvicër dhe Europë.

Po çfarë është saktësisht një “bateri uji”?

Një “bateri uji” ose një central i magazinimit të pompuar të ujit, është një lloj depozitimi i energjisë hidroelektrike. Bateria përbëhet në thelb nga dy pishina të mëdha uji të vendosura në lartësi të ndryshme. Ajo mund të ruajë energjinë e tepërt duke pompuar ujin nga pishina që ndodhet poshtë te pishina që ndodhet më lart, duke e “karikuar” në mënyrë efektive baterinë.

“Bateria e ujit” zvicerane, do të jetë një nga

Kur nevojitet energji elektrike ndryshon edhe drejtimi i ujit. Rrjedha e ujit rrotullon një turbinë, e cila gjeneron energji hidroelektrike. Hidro-bateritë janë veçanërisht të dobishme për ruajtjen e energjisë së tepërt të prodhuar nga burime të ndërprera të energjisë si era, dielli dhe ajo bërthamore.

Energjia pompohet deri në pishinën e sipërme në kohën e mbiprodhimit, dhe më pas mund të lirohet për të prodhuar energji gjatë periudhave kur ka një kërkesë të lartë. “Bateritë e ujit” janë lloji me kapacitet më të madh i ruajtjes së energjisë në rrjet që është aktualisht në dispozicion.

Pse Zvicra ka ndërtuar një “bateri uji” gjigante?

Centrali zviceran, i ndërtuar nga kompania "Nant de Drance", është vënë në punë që më 1 korrik. Ai ka 6 turbina të pajisura me pompa, dhe një fuqi totale prej 900 Megavat, e mjaftueshme për të furnizuar me energji deri në 900.000 shtëpi.

Me një kapacitet magazinimi prej 20 milionë kilovatorë energji elektrike, shpresohet që kjo “bateri uji” të luajë një rol të rëndësishëm në stabilizimin e rrjeteve energjetike të Zvicrës dhe Evropës. Gjatë periudhave me kërkesë të lartë, sikurse janë valët e të nxehtit, kjo bateri e veçantë mund të zvogëlojë gjasat e një mbingarkese të rrjetit.

Sfidat inxhinierike të ndërtimit të një baterie të tillë

Bateria ndodhet 600 metra nën tokë midis rezervuarëve Emosson dhe Vieux Emosson në Valais. U deshën plot 14 vjet për ta përfunduar këtë vepër, për shkak të sfidave të mëdha logjistike dhe inxhinierike. Kështu për të krijuar atë, u desh të hapeshin 18 kilometra tunele nëpër Alpe.

Këto tunele mundësonin transportin e materialeve të ndërtimit dhe ndërtesave të parafabrikuara në mal. Në zemër të centralit gjendet dhoma e madhe e motorit me përmasa gati 200 metra të gjatë dhe 32 metra të gjerë. Gjatë viteve 2012-2016, lartësia e digës Vieux Emosson u rrit me 20 metra, për t’i dhënë mundësi rezervuarëve të ruajnë më shumë ujë, dhe të prodhojnë më shumë energji./“Euronews”-Përshtatur në Shqip nga CNA.al