E fundit!

15:57 Aktualitet

Shtyhet seanca e Metës në GJKKO/ Ja data e radhës

Seanca në themel në Gjykatën e Posaçme për kreun e Partisë...

Zgjedhjet lokale/ Agron Duka: Jemi për një bashkim opozitar

25 Shtator 2022, 11:17, Aktualitet CNA

Agron Duka

Kreu i Partisë Agrare, Agron Duka, i ka bërë thirrje forcës opozitare të bashkohet dhe të tejkalojë ngërçin, pasi ndërkohë që PD-ja ende nuk ka nisur me organizimin, Partia Socialiste ka nisur fushatën për zgjedhjet lokale.

Në një prononcim, Agron Duka është shprehur se përsëritja e gabimeve të së shkuarës do të ishte edhe më fatale, pasi lejon qëndrimin e mazhorancës në pushtet.

Duka inkurajon të gjitha forcat opozitare të organizohen një orë e më parë, për të gjetur pikat e bashkëpunimit, për t’i dhënë fund monopolit antidemokratik të mazhorancës aktuale moniste.

"Jemi për një bashkim opozitar në zgjedhjet lokale.

-Kam ndjekur me vëmendje qëndrimin e demokratëve të Mirditës, të shprehur nga z. Alfred Duka, i cili nuk sintetizon vetëm vullnetin e tyre për bashkim përpara zgjedhjeve vendore brenda radhëve të Partisë Demokratike, por edhe një kambanë alarmi për opozitën në të gjitha grupimet e saj, pasi zgjedhjet vendore janë pak muaj larg dhe koha nuk pret.

Përtej pakënaqësive midis palëve brenda PD-së, është jetike për vendin që ky ngërç të tejkalohet sa më parë në forcën kryesore të opozitës, sepse ndërkohë që ne nuk kemi nisur ende organizimin, Partia Socialiste e ka nisur fushatën.

Përsëritja e gabimeve të së shkuarës do të ishte edhe më fatale, pasi qytetarët më shumë se kurrë, kanë nevojë të përfaqësohen nëpërmjet opozitës në institucionet e pushtetit vendor, sepse është e qartë për të gjithë që kjo mazhorancë nuk ka asgjë për të ofruar dhe vetëm çorganizimi ynë, lejon qëndrimin e saj në pushtet!

Ndaj mbështes qëndrimin e demokratëve të Mirditës dhe uroj që ky vullnet i mirë, të përhapet në gjithë Shqipërinë.

Inkurajoj gjithashtu të gjitha forcat opozitare të organizohen një orë e më parë, për të gjetur pikat e bashkëpunimit, të bazuara mbi vlerat e përbashkëta dhe ambiciet për të përfaqësuar sa më mirë qytetarët shqitarë, duke i dhënë fund monopolit antidemkratik të mazhorancës aktuale moniste.

Si një politikan me një përvojë të gjatë, që në asnjë moment nuk kam vendosur interesat për pushtet mbi qëllimet e përbashkëta, ndjejë përgjegjësinë qytetare që të hedhë një hap në drejtim të bashkimit të opozitës në funksion të zgjedhjeve vendore, duke mbështetur rezolutën e demokratëve të Mirditës si një platformë që i vlen të gjitha partive opozitare”, tha Duka./ CNA.al