E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Zero raste të kultivimit të kanabisit në Pogradec gjatë vitit të kaluar/ Prezantohet plan i ri masash për 2026

6 Shkurt 2026, 17:00, Aktualitet CNA

Falë bashkëpunimit të ngushtë mes Policisë së Shtetit dhe pushtetit vendor, viti 2025 u mbyll pa asnjë rast të evidentuar të kultivimit të kanabisit në territorin e Bashkisë Pogradec.

Ky rezultat u vlerësua si tregues i efektivitetit të koordinimit mes institucioneve dhe punës së vazhdueshme monitoruese në terren. Në një takim të zhvilluar së fundmi, Kryekomisar Gentan Dedej dhe nën/prefekti Luan Maxhari prezantuan planin e masave për vitin 2026.

"Qëllimi i këtij takimi është lufta dhe sensibilizimi kundër kanabis sativa, kemi hartuar planet e masave, kryesisht ato operacionale ndaj kësaj veprimtarie kriminale. Këtu jemi që gjithësecili të mareë përgjegjësitë e veta, ne si komisariat kemi detyrat tona, pushteti vendor ka të vetat, njësitë dje kryepleqtë kanë përgjegjësitë e veta. Gjatë 2025 ka pasur zero raste të kultivimit në Pogradec, këtë bashkëpunim e dua edhe për këtë vit. Pogradeci si qytet që i përket librit, penës, shkollës, ndaj nevojitet bashkëpunimi mes nesh, që zëri jonë të shkojë në çdo familje dhe këtë punë të mirë të bërë nga paraardhësit e mi dhe ju që jeni këtu ta kemi edhe përgjatë 2026-ës", u shpreh kryekomisari, Gentian Dedej.

Nënprefekti i Pogradecit Luan Maxhari, u shpreh se duhet kujdes i shtuar në zonat e thella malore, për shkak se sipas tij ka pak banorë dhe janë zona të largëta që mund të shfrytëzohen për këtë fenomen negativ

"Na duhet ta ruajmë këtë trend pozitiv dhe vëmendje më e shtuar. Kujdes i shtuar duhet në zonat e thella malore, për shkak sepse ka pak banorë, janë zona të largëta dhe mund të shfrytëzohen për këtë fenomen negativ. Duhet të kemi kujdes edhe me shtëpitë e braktisura nëpër fshatra, pasi gjenden forma të ndryshme për kultivimin e kësaj bime. Duhet ti kemi nën vëzghim objeketet e braktisura, parcelat e braktisura ndaj do tju lutesha ta vijojmë këtë punë të mirë edhe gjatë këtij viti", tha nënprefekti i Pogradecit Luan Maxhari.

Gjatë takimit u kërkua thellimi i bashkëpunimit mes strukturave të policisë dhe kryepleqve të fshatrave, me fokus jo vetëm monitorimin e territorit, por edhe parandalimin e çdo tentative për kultivimin e bimëve narkotike.

Autoritetet theksuan se bashkëpunimi me komunitetin mbetet kyç për ruajtjen e këtij standardi edhe gjatë vitit të ardhshëm, me synimin për të garantuar siguri dhe rend në të gjithë territorin e Pogradecit. /CNA