web counter
LEXO PA REKLAMA!

SHKARKO APP

App Store
Google Play

E fundit!

x

U bllokua për shkak të ortekëve/ Hapet aksi Qafë Thore-Theth

6 Shkurt 2026, 16:04, Aktualitet CNA

U bllokua për shkak të ortekëve/ Hapet aksi Qafë Thore-Theth

Zona e Qafë Thores në aksin Bogë–Theth është rihapur për qarkullimin e automjeteve, pasi u bllokua një ditë më parë si pasojë e rënies së ortekëve dhe prezencës së konsiderueshme të borës në rrugë.

Bllokimi i këtij segmenti rrugor u regjistrua që nga e enjtja, duke pamundësuar lëvizjen e automjeteve për shkak të reshjeve intensive të borës dhe ortekëve të aktivizuar gjatë natës. Mjetet borëpastruese kanë punuar pa ndërprerje në zonë, duke bërë të mundur largimin e sasive të mëdha të borës dhe rikthimin e qarkullimit në këtë aks të rëndësishëm për zonën turistike të Thethit.

Megjithatë, autoritetet u bëjnë thirrje drejtuesve të automjeteve që të tregojnë kujdes maksimal gjatë qarkullimit, të jenë të pajisur me goma dimërore dhe zinxhirë, si dhe të shmangin lëvizjet e panevojshme, për shkak të kushteve të paqëndrueshme atmosferike.

Ndërkohë, sipas informacionit të përditësuar nga strukturat e Mbrojtjes Civile për territorin e Qarkut Shkodër, situata paraqitet e qetë dhe pa problematika madhore.

Në Bashkitë Shkodër, Malësi e Madhe, Vau i Dejës, Pukë dhe Fushë-Arrëz, strukturat përkatëse nuk kanë raportuar situata problematike apo emergjenca të shkaktuara nga moti.

Sa i përket furnizimit me shërbime bazë, në nivel qarku, furnizimi me ujë të pijshëm dhe energji elektrike vijon normalisht dhe pa ndërprerje.

Në akset rrugore, sipas të dhënave nga DRV Shkodër dhe kontraktorët e mirëmbajtjes, në segmentet Qafë Mali–Fierzë dhe Hadroj–Qafë Bene, qarkullimi kryhet vetëm me goma dimërore ose zinxhirë. Ndërsa në aksin Bogë–Theth, edhe pse qarkullimi është rikthyer, mjetet e mirëmbajtjes ndodhen ende në terren në zonën e Qafë Thores dhe vijojnë punën për pastrimin e borës së depozituar nga ortekët dhe garantimin e sigurisë rrugore.

Nga ana tjetër, sipas Drejtorisë së Ujitjes dhe Kullimit Lezhë, pas rreth 5 mm reshje shiu në 24 orët e fundit, në infrastrukturën e kullimit dhe të mbrojtjes nga përmbytjet nuk raportohen probleme. /CNA





Lajmet e fundit nga