E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

KLGJ pranon pjesërisht kërkesën e ILD-së për masë disiplinore ndaj gjyqtarit të Durrësit

5 Shkurt 2026, 17:53, Aktualitet CNA

KLGJ pranon pjesërisht kërkesën e ILD-së për masë

Këshilli i Lartë Gjyqësor ka pranuar pjesërisht kërkesën e Inspektorit të Lartë të Drejtësisë për masë disiplinore ndaj magjistratit Shkëlzen Liçaj, që shërben si gjyqtar pranë Gjykatës së Shkallës së Parë të Juridiksionit të Përgjithshëm Durrës, për zvarritje të përsëritur në zbardhjen e vendimeve gjyqësore.

Propozimi i ILD-së për caktimin e masës disiplinore “Ulje e përkohshme e pagës deri në 40 për qind, për një periudhë jo më të gjatë se një vit”, u pranua pjesërisht, duke u pranuar shkelja disiplinore e duke u caktuar ndaj gjyqtarit masa disiplinore “Vërejtje publike”.

“Hetimi disiplinor ndaj Sh.L., gjyqtar pranë Gjykatës së Shkallës së Parë, Juridiksioni i Përgjithshëm Sarandë, nisi bazuar në 12 ankesa për zvarritje në zbardhjen e vendimeve të arsyetuara nga gjyqtari, shkelje disiplinore të parashikuara nga neni 102, pika 1, shkronja “d” i ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, i ndryshuar.

Raporti voluminoz i hetimit të inspektorëve të ILD-së, me dy procedime të bashkuara e objekt hetimi të shtuar për gjyqtarin, evidentoi vonesa të përsëritura të zbardhjes së vendimeve në tejkalim të afatit ligjor deri në 4 vite, vendime që i përkasin periudhës së viteve 2021, 2022, 2023. Raporti i inspektorëve të ILD-së konkludoi nga ana e magjistratit janë ndërmarrë veprime/mosveprime në shkelje të afateve procedurale civile dhe penale të arsyetimit të vendimit gjyqësor, duke tejkaluar afatet tej çdo llogjike, ku mosrespektimi i afateve ligjore nuk paraqitet si episod i izoluar, por si model i përsëritur në tri vite radhazi dhe në përmasa jashtë çdo standardi ligjor dhe profesional të afateve të vonesës. Zvarritja sistematike dhe e përsëritur përtej këtyre afateve, përbën tregues të qartë të mosrespektimit të përgjegjësive funksionale.

Pavarësisht parashtrimeve të magjistratit lidhur me ngarkesën në punë dhe për gjendjen e sistemit gjyqësor, nga analiza e situatës rezultoi se ai nuk ka përmbushur në mënyrë të plotë dhe të qëndrueshme detyrimet ligjore dhe funksionale, që i ngarkohen për arsyetimin dhe dorëzimin në kohë të vendimeve gjyqësore.

Në raportin hetimor vërehet se shkelja disiplinore e gjyqtarit ka sjellë mos marrje në kohë të produktit të pritshëm nga gjykimi i një çështjeje të caktuar, vonesa në ushtrimin e të drejtës së ankimit apo edhe vonesa të theksuara në ekzekutimin e vendimit gjyqësor, si pasojë e mosarsyetimit në kohë të vendimeve, pra një drejtësi e mohuar.

Duke marrë parasysh eksperiencën e pakët 5 vjeçare në sistem, Inspektori i Lartë i Drejtësisë konkludoi se veprimet/mosveprimet e ndërmarra nga ana e magjistratit Sh.L, përbëjnë “Shkelje të rëndë disiplinore” dhe i propozoi Këshillit të Lartë Gjyqësor caktimin e masës disiplinore “Ulje e përkohshme e pagës deri në 40 për qind, për një periudhë jo më të gjatë se një vit”, parashikuar nga neni 105, pika 1, shkronja “c”, ndarja “i” dhe neni 108 i ligjit nr. 96/2016 “Për statusin e gjyqtarëve dhe të prokurorëve në Republikën e Shqipërisë”, i ndryshuar. Këshilli i Lartë i Drejtësisë njohu shkeljen disiplinore dhe caktoi masën “Vërejtje publike” ndaj gjyqtarit Sh. L.”,-thuhet në njoftim./CNA