Kundër projektit "TID"/ Banorët e Durrësit, protestë para bashkisë: Nuk i lëshojmë banesat tona

5 Shkurt 2026, 12:08, Aktualitet CNA

Kundër projektit "TID"/ Banorët e Durrësit,

Banorët e Durrësit kanë protestuar ditën e sotme para bashkisë kundër projektit “TID”, për rijetëzimin dhe rikualifikimin urban të disa zonave të qytetit.

Banorët janë shprehur kundër projektit dhe kanë paralajmëruar se nuk do të largohen nga banesat e tyre, për të cilat thanë se janë mbi 100-vjeçare.

“Ne jemi njoftuar gojarisht të aplikojmë për banesa sociale. Ne ndihemi të poshtëruar dhe ndihemi si plaçka. Nuk na intereson vlera e banesës që do të na japin. Shtëpinë tonë nuk e lëshojmë. Jemi kundër shembjes së banesave tona që janë mbi 100-vjeçare. Të prishësh këto banesa do të thotë të zhdukësh historinë e qytetit”, u shpreh ajo.

Një tjetër banore shtoi më tej se kërkojnë komision hetimor, ndërsa bëri përgjegjëse për situatën, kryetaren e bashkisë, Emirjana Sakon.

“Jemi këtu t'i themi bashkisë që nuk jemi ne për shtëpi sociale. Ne nuk jemi dakord me planin. Ne kemi kërkuar komisionin hetimor dhe këto nuk e pranojnë. Unë bëj përgjegjëse kryetaren e bashkisë, Emirjana Sakon. Nuk ka të drejtë të nxjerrë njerëz për t'u informuar nëse jemi apo jo në shtëpitë tona. Të ngrenë urgjent komisionin hetimor. Jemi kundër këtij projekti dhe shtëpive sociale”, tha banorja.

Banorëve në protestë u është bashkuar edhe deputeti i Partisë Demokratike, Igli Cara. Ai tha se lagjja ku është parashikuar të zhvillohet projekti është një lagje autoktone, ndërsa theksoi se pronat nuk mund t’i merren askujt.

“I bashkëngjitem protestës së banorëve. Kjo çështje nuk është vetëm e banorëve, por e gjithë Durrësit. Kur flasim për një lagje autoktone është një pronë edhe e qytetit të Durrësit edhe kombëtare. Pronat nuk mund t’i merren askujt. Të flasësh për TID duhet trajtuar më gjerë. Është projekt zhvillimi, por nëse në emër të zhvillimit ka abuzim ne do të reagojmë. Vjen TID, por kush janë aktorët në këtë çështje. Po në finale, çfarë do të merret? Kur jepet një proces zhvillimi duhet dhënë dhe një vlerë e projektit”, tha Cara. /CNA