web counter
LEXO PA REKLAMA!

SHKARKO APP

App Store
Google Play

E fundit!

x

Pa rrugë dhe pa ndihmë/ Fshati Senisht në Maliq në izolim prej 2 muajsh

6 Shkurt 2026, 15:41, Aktualitet CNA

Pa rrugë dhe pa ndihmë/ Fshati Senisht në Maliq në izolim

Rruga që lidh fshatin Senisht me pjesën tjetër të bashkisë Maliq është bllokuar prej disa muajsh, si pasojë e reshjeve të dendura të shiut. Segmenti rrugor ka pësuar çarje të shumta dhe rrëshqitje dherash, duke u bërë i pakalueshëm për mjetet. Aktualisht, banorët e kalojnë vetëm në këmbë, mes rrezikut dhe vështirësive të mëdha.

Në këtë fshat jetojnë 8 familje, të cilat prej muajsh janë izoluara dhe kërkojnë ndërhyrje urgjente nga bashkia për stabilizimin e rrugës. Rruga paraqet rrezik të vazhdueshëm, për shkak të rënies së gurëve dhe dherave, ndërsa dëmtimet janë përkeqësuar nga dita në ditë. Banorët shprehen se, pavarësisht premtimeve, asnjë ndërhyrje nuk është kryer deri tani.

“Ka 3-4 muaj dhe s’ka ardhur njeri. Na kanë thënë që do vijnë, por nuk kanë ardhur. Gjendja është shumë e keqe, bien gurë, rruga është e bllokuar. Mezi kalojmë, makinat prishen vazhdimisht. Ka shumë çarje poshtë. Jemi më shumë se 6 familje këtu. Nëse sëmuret dikush, duhet të zbresë në këmbë, por rruga është shumë e keqe", shprehet banori.

"Rruga është e pakalueshme. Ka shpesh rënie dherash. Kjo gjendje vazhdon prej rreth 2 muajsh. Nuk kemi marrë asnjë njoftim apo sqarim. Njerëzit zbresin në këmbë ose me kuaj. Nuk ka asnjë mundësi për makina. Mund të zgjasë deri në një orë e gjysmë rrugë në këmbë”, thotë një tjetër.

Nga komunikimi me bashkinë Maliq bëhet me dije se rruga ka pësuar rrëshqitje në rreth 80 metra të gjatësisë së saj. Sipas autoriteteve lokale, ndërhyrja do të kryhet sapo të përmirësohen kushtet atmosferike, për të mundësuar çuarjen e një eskavatori dhe hapjen e një rruge alternative për banorët e zonës.

Ndërkohë, familjet e Senishtit vijojnë të jetojnë të izoluara, duke u përballur çdo ditë me rrezikun dhe mungesën e aksesit në shërbime bazë. /CNA





Lajmet e fundit nga