web counter
LEXO PA REKLAMA!

SHKARKO APP

App Store
Google Play

E fundit!

x

Vrasja e Astrit Kalasë/ Gjykata e Lartë thërret në mbledhje të gjithë gjyqtarët e vendit

7 Tetor 2025, 16:32, Aktualitet CNA

Vrasja e Astrit Kalasë/ Gjykata e Lartë thërret në mbledhje

Gjykata e Lartë ka njoftuar do të zhvillojë një mbledhje të veçantë bashkë me të gjithë gjyqtarët e Shqipërisë. Mbledhja do të mbahet të enjten në orën 10:00 në ambientet e Këshillit të Lartë Gjyqësor.

Në njoftimin e Gjykatës së Lartë, thuhet se kjo mbledhje, e cila thirret pas vrasjes së gjyqtarit Astrit Kalaja, përfaqëson një moment bashkimi, reflektimi dhe force morale për gjithë trupën gjyqësore të vendit.

Gjithashtu më tej theksohet se asnjë akt dhune nuk do të përkulë drejtësinë, asnjë kërcënim nuk do të ndalojë gjyqtarët të kryejnë detyrën dhe asnjë presion politik apo publik nuk do të cënojë pavarësinë e gjykimit.

Duke iu drejtuar qytetarëve në njoftim, gjykata shprehet se drejtësia është mburoja më e fortë e shoqërisë dhe thotë se vrasja e gjyqtarit është një moment që kërkon forcë, qetësi dhe unitet.

Njoftimi i plotë:

Ngjarja e rëndë dhe e dhimbshme e ndodhur së fundmi, që tronditi thellë sistemin gjyqësor dhe opinionin publik, ka nxjerrë në pah gjendjen e brishtë të sigurisë, por edhe rëndësinë e respektit që duhet të shoqërojë ushtrimin e funksionit gjyqësor.

Pas dakordësisë së shprehur nga të gjithë gjyqtarët e Gjykatës së Lartë dhe pas takimit të zhvilluar me zëvendëskryetarët e të gjitha gjykatave të vendit, është autorizuar Kryetari i Gjykatës së Lartë që, në ushtrim të përgjegjësive institucionale, të thërrasë të gjithë gjyqtarët e Republikës së Shqipërisë në një mbledhje të veçantë, e cila do të zhvillohet ditën e enjte, më datë 9 tetor 2025, ora 10:00, në ambientet e Këshillit të Lartë Gjyqësor.

Kjo mbledhje përfaqëson një moment të rëndësishëm bashkimi, reflektimi dhe force morale për gjithë trupën gjyqësore të vendit, e cila do të shprehë qartë dhe me dinjitet se:

·         asnjë akt dhune nuk do ta përkulë drejtësinë;

·         asnjë kërcënim nuk do ta ndalë gjyqtarin të kryejë me ndershmëri detyrën;

·         asnjë presion politik apo publik nuk do të cenojë pavarësinë e gjykimit.

Gjyqtarët e Republikës së Shqipërisë do të qëndrojnë të bashkuar, me kurajë dhe vendosmëri, për të mbrojtur jo vetëm jetën dhe dinjitetin e tyre, por edhe vetë të drejtën e qytetarëve për një drejtësi të paanshme dhe të pavarur.

Në këtë moment të ndjeshëm, trupa gjyqësore i drejtohet opinionit publik me besim dhe respekt, duke ftuar të gjithë të kuptojnë se drejtësia nuk është armike e askujt, por mburoja më e fortë e shoqërisë dhe e çdo qytetari ndaj padrejtësisë dhe dhunës.

Ky është një moment që kërkon forcë, qetësi dhe unitet. Drejtësia shqiptare do të vazhdojë misionin e saj me dinjitet, besim dhe vendosmëri./CNA





Lajmet e fundit nga