E fundit!

15:37 Aktualitet

Gjyqtari i Gjykatës së Lartë dorëhiqet nga shqyrtimi i çështjes së Veliajt/ Ja kush caktohet relator

Gjyqtari i Gjykatës së Lartë, Ilir Panda ka dhënë dorëheqj...

Vrasja e Astrit Kalasë/ Shoqata Europiane e Gjyqtarëve miraton rezolutën, thirrja për qeverinë shqiptare

15 Tetor 2025, 11:15, Aktualitet CNA

Vrasja e Astrit Kalasë/ Shoqata Europiane e Gjyqtarëve miraton

Astrit Kalaja

Shoqata Europiane e Gjyqtarëve (EAJ) ka miratuar një rezolutë në mbështetje të gjyqtarëve shqiptarë, pas vrasjes së gjyqtarit Astrit Kalaja në krye të detyrës.

Kjo rezolutë u miratua unanimisht me kërkesë të Unionit të Gjyqtarëve të Shqipërisë, në takimin vjetor të Shoqatës Ndërkombëtare të Gjyqtarëve, pjesë e së cilës është edhe EAJ, që po mbahet në Baku të Azerbajxhanit nga data 11 deri më 17 tetor.

Në rezolutë i bëhet thirrje qeverisë shqiptare të garantojë respektimin e pavarësisë gjyqësore, të ndalojë kritikat e pajustifikuara, kërcënimet dhe sulmet ndaj gjyqtarëve dhe gjithashtu të marrë masa sigurinë e tyre.

Rezoluta e plotë e Shoqatës Europiane të Gjyqtarëve:

Në mbledhjen e saj në Baku më 14 tetor 2025, Shoqata Evropiane e Gjyqtarëve (“EAJ”) u informua nga anëtari i saj, Unioni Shqiptar i Gjyqtarëve, për vrasjen e fundit të një gjyqtari në një gjykatë apeli në Shqipëri, Astrit Kalaja, i cili u qëllua me armë ndërsa po shpallte një vendim. Delegatët e pranishëm u tronditën nga ky lajm dhe shprehën ngushëllimet e tyre për familjen, miqtë dhe kolegët e gjyqtarit.

Delegatët shprehën gjithashtu shqetësim të thellë kur mësuan rrethanat në të cilat ndodhi ky akt. Përveç faktit që sistemi gjyqësor është nën presion për shkak të mungesës së gjyqtarëve si rezultat i procesit të rivlerësimit (vetingut), gjyqtarët kanë qenë së fundmi objekt i sulmeve publike abuzuese në media nga figura të larta politike. Këto sulme kanë shkuar deri në identifikimin dhe ofendimin e gjyqtarëve individualë, përfshirë publikimin e fotografive të tyre në rrjete sociale. Thirrjet e përsëritura të Unionit Shqiptar të Gjyqtarëve dhe të Këshillit të Lartë Gjyqësor për t’i dhënë fund këtyre sulmeve publike ndaj anëtarëve të gjyqësorit janë injoruar, dhe për pasojë, besimi i publikut në sistemin gjyqësor vazhdon të gërryhet, ndërsa gjyqtarët detyrohen të punojnë në një mjedis armiqësor nga ana e opinionit publik.

E papranueshmëria e një sjelljeje të tillë është e vetëkuptueshme. Standardet evropiane janë të qarta:

(i) “Ndërsa kritika objektive ndaj gjykatave dhe vendimeve të tyre është e lejueshme, nuk është e pranueshme që pushtetet e tjera në shtet të kritikojnë gjyqësorin në një mënyrë që minon pavarësinë, autoritetin gjyqësor ose besimin e publikut te gjyqësori dhe që nxit mosbindje apo edhe dhunë ndaj gjyqtarëve.”

(ii) “Pushtetet ekzekutive dhe legjislative kanë detyrimin të sigurojnë të gjitha masat e nevojshme dhe të përshtatshme të mbrojtjes kur funksionet e gjykatave rrezikohen nga sulme fizike ose kërcënime të drejtuara ndaj anëtarëve të gjyqësorit.”

Prandaj, EAJ i bën thirrje qeverisë së Shqipërisë:

• të garantojë respektimin e pavarësisë gjyqësore;

• të ndalojë kritikat e pajustifikuara, kërcënimet dhe sulmet ndaj gjyqtarëve; dhe

• të marrë masa efektive për të garantuar sigurinë e gjyqtarëve. /CNA