“Turp, nuk respektojnë bukën që hanë”/ Media greke, shkrim racist për festimet e shqiptarëve në Athinë

29 Nëntor 2024, 20:58, Aktualitet CNA

“Turp, nuk respektojnë bukën që hanë”/ Media

Shqiptarët duke festuar në sheshin Sintagma

Shqiptarët në të gjithë botën kanë festuar për Pavarësinë e Shqipërisë.

Festa nuk ka munguar as në Greqi, por mediat e shtetit fqinj nuk e kanë pritur mirë atmosferën e krijuar nga shqiptarët.

Media greke “Newsbomb.gr” ka bërë një shkrim racist ndaj shqiptarëve dhe festimet e tyre i ka cilësuar si provokime.

“Newsbomb.gr” ka shkruar se Shqipëria nuk do t’i lejonte grekët të festonin në Tiranë, ndërsa i ka përmendur bukën emigrantëve.

Shkrimi i plotë:

Ne jemi duke fjetur dhe shqiptarët festuan në Athinë! Skena që provokojnë grekët dhe shpërqendrojnë vendin janë shpalosur në sheshin Sintagma në eventin e ndezjes së pemës së Krishtlindjes.

Po të bëhej diçka e tillë nga grekët në Shqipëri, të gjithë do të arrestoheshin dhe do të futeshin në burg pa u gjykuar. Këtu në Greqi ne jemi tepër indiferent. Skenat që u zhvilluan mbrëmjen e së enjtes në sheshin Sintagma janë të paimagjinueshme. Grupe të organizuara shqiptarësh që jetojnë në Greqi mbërritën me makinat e tyre në Syntagma, teksa valëvitnin flamujt shqiptarë nga dritaret e tyre gjatë gjithë rrugës!

Me të mbërritur në Sintagma, ata u ngjitën në pjesën e sipërme të sheshit, përballë Parlamentit Helen, shpalosën flamujt e tyre dhe brohoritën parulla për kombin e tyre. Vihet re se në të njëjtën kohë është ndezur pema e Krishtlindjeve në sheshin Sintagma, teksa shqiptarët po përpiqeshin të mbulonin muzikën me zërin e tyre. Madje, ata arritën deri aty sa të thërrisnin edhe parulla për UÇK-në, ndërsa mes tyre kishte edhe më provokues që valëvitnin pankarta me Shqipërinë e Madhe!

Kujtojmë se më 28 nëntor 1912 u nënshkrua shpallja e pavarësisë së Shqipërisë nga Perandoria Osmane. Siç shihet në videot e postuara në TikTok, shqiptarët mbanin në duar flamuj, të veshur me këmisha me stemën kombëtare dhe duke kënduar himne tradicionale të atdheut të tyre me sloganet “Shqipëria e Madhe”.

Në periudhën e fundit, si me burgosjen e Fredi Belerit, ashtu edhe me festat e Edi Ramës në Galatsi dhe Selanik, shqiptarët po tregojnë një provokim agresiv të paparë ndaj Greqisë. Sigurisht, gjejnë dhe bëjnë… Sepse po të ishte serioz shteti nuk do të lejonte një propagandë të tillë para Kuvendit të Greqisë dhe monumentit të ushtarit të panjohur.

Nuk e respektojnë as bukën që hanin e hanë në Greqi! Fjala turp nuk mjafton për të përshkruar imazhet specifike dhe tolerancën e propagandës së zezë të shqiptarëve./ CNA