Thirrja e fortë e Sonila Meços në këtë Krishtlindje/ “Të shpëtojmë Leon, të lumturojmë zemrën e një nëne”

25 Dhjetor 2022, 14:51, Aktualitet CNA

Thirrja e fortë e Sonila Meços në këtë Krishtlindje/

Foto ilustruese

Gazetarja dhe moderatorja Sonila Meço u ka bërë një thirrje të fortë të gjithë shqiptarëve në këtë ditë Krishtlindjeje.

Meço kërkon nga shqiptarët që të kontribuojnë sado pak për t'i ardhur në ndihmë një djali 14-vjeçar, Leos, i cili vuan nga një sindormë e rrallë, e cila e ka lënë të ngjitur pas një karrige me rrota.

Duhen vetëm 40 mijë euro që Leo të kryejë një ndërhyrje dhe të ndodhë mrekullia që ai të ecë sërish.

Më poshtë në statusin e saj gazetarja ka publikuar të gjitha mënyrat me të cilat mund t'i vini në ndihmë Leos.

“Pak, fare pak duhet të shpëtojmë Leon e mençur e maturuar vuajtjesh, 1 euro secili nga 2 milionët e mbetur këtyre anëve e prej miliona shqiptarëve shpërndarë nëpër botë do qe dhurata më e vyer këtyre Krishtlindjeve”, shkruan Sonila Meço ndër të tjera.

"Në Krishtlindje, Maria e dlirë mbajti në krahë mrekullinë e saj dhe solli në jetë Krishtin për të ndërtuar copëza parajse në një botë të thyer e dëmtuar.

Kur një nënë pret për herë të parë fëmijën e saj, me kokën lart falënderon Zotin për mrekullinë, që e rilind botën të dlirë sërish.

Në këtë ditë të bekuar, pasi të përqafoni e gëzoni dashuritë e mëdha të jetës, ktheni pakëz vëmendjen tek një fëmijë, që lumturoi në lindje Anxhelën, por nuk po gëzon ditët e veta prej një sindrome, që për fat ka kurim, por kërkon 40,000 euro për të bërë mrekullinë: Leo të ecë, t’i pushojnë dhimbjet rraskapitëse të trupit, t’i japë fund zinxhirit me plot 14 operime në 14 vjet dhe të prekë parajsën e tij në tokë.

A nuk qe ky edhe misioni i birit të Zotit në tokë?

Me atë vlerë abuzuar rëndshëm nga ata që duhej ta ndanin për rë mirën tonë, barabitet një udhëtim qejfi pushtetarësh.

Por në betejën mes së mirës e së keqes, u flijua një Krisht…nuk na kërkohet aq assesi, megjithëse bota është ndyer e ngjyer mëkatit si derri në llucë.

Pak, fare pak duhet të shpëtojmë Leon e mençur e maturuar vuajtjesh, 1 euro secili nga 2 milionët e mbetur këtyre anëve e prej miliona shqiptarëve shpërndarë nëpër botë do qe dhurata më e vyer këtyre Krishtlindjeve.

Përulje për këdo, që edhe me një cent ngre një njeri në këmbë, i jep fund një drame, lumturon një zemër nëne, na dhuron një Kampion!", shkruan Sonila Meço./ CNA.al