E fundit!

11:30 Aktualitet

Kultura nën drejtimin e Gonxhes/ Nënfinancimi dhe pasojat në tregun e punës

Raporti më i fundit i INSTAT për vitin 2025 zbulon një rea...

Tetori Rozë/ Shtohen rastet me kancerin e gjirit në Korçë

4 Tetor 2024, 11:19, Aktualitet CNA

Në Korçë janë shtuar rastet e pacienteve të prekura nga kanceri i gjirit, të cilat janë shfaqur për herë të parë në spitalin e qytetit. Rreth 46 raste janë diagnostikuar në Korçë, krahasuar me vitin e kaluar kur ka pasur më pak raste të vajzave dhe grave të prekura nga kjo sëmundje. Fatmirësisht, pacientet e diagnostikuara për herë të parë e kanë kapur sëmundjen në stad të hershëm e kjo e bën më të lehtë kurimin e sëmundjes. Jusilda Dervishi, mjeke onkologe pranë spitalit të qytetit, ka treguar situatën aktuale në të cilat përballet shërbimi i mamografisë dhe pacientet e prekura nga kanceri i gjirit.

"Pak a shumë jemi në të njëjtën situatë si në vitin e kaluar. Janë rreth 46 raste të reja të diagnostikuara për herë të parë me kancer gjiri, të cilat kanë marrë trajtim prane Spitalit Rajonal Korçë, fillon me diagnostikim në Korçë, nisen për biopsi në QSUT dhe më pas kthehen për trajtim në spitalin e Korçës.

Përgjithësisht ka në të gjitha stadet, si stadet e hershme. Këto kohë kemi pasur pacientë që janë diagnostikuar në stadet e hershme kjo për shkak se janë ndërgjegjësuar për të bërë kontrolle më të shpeshta dhe sa më shpesh të bëhet ky kontroll i gjirit me eko e mamografi, aq më shumë rritet mundësia që pacientja të diagnostikohet në një stad më të hershëm."

Mjekia onkologe bën me dije se kanceri i gjirit ka prekur edhe moshat e reja, pasi në spital po trajtohen edhe paciente në moshën 30-vjeçare. Sipas saj, grupmoshat e prekura variojnë nga 45 deri në 65 vjeç, por ka edhe në moshë më të vjetër. Femrat duhet të ndërgjegjësohen duke bërë kontrolle të paktën 1 herë në 6 muaj pasi edhe diçka e vogël që mund të duket e parëndësishme në gji, mund të diagnostikohet si sëmundje e kancerit.

"Kanceri i gjirit tashmë prek edhe moshat e reja, ne kemi pacientë 30 vjeç që janë duke u trajtuar me kancer gjiri. Grupmoshtat më të prekura vazhdojnë të jenë 45 vjeç deri në 65 vjeç. Kjo nuk do të thotë që edhe pas moshës 65 vjeç nuk ka kancer gjiri, kanceri i gjirit prek edhe mbi këtë moshë. Janë ndergjegjësuar sepse sapo prekin diçka të dyshimtë, sikur edhe një gjë të vogël vijnë bëjnë eko dhe konsultat e nevojshme. Këshilla ime është të bëjnë eko të paktën një herë në 6 muaj pasi çdo gjë që preket në gji edhe pse nuk dhemb duhet patjetër të verifikohet, pasi kanceri i gjirit nuk dhemb asnjëherë."

Sipas të dhënave, në 970 cikle kimioterapie që po kryhen nga janari i këtij viti e deri në muajin shtator, 500 prej tyre u përkasin pacientëve të diagnostikuar me kancer gjiri. Spitali i Korçës i ka të gjitha medikamentet e duhura për trajtimin e pacienteve me këtë sëmundje, ndërsa apeli i mjekëve vjen për gratë e vajzat të cilat duhet të mos neglizhojnë kontrollet periodike të mamografisë dhe ekografisë, pavarësisht moshës./ CNA