web counter
LEXO PA REKLAMA!

SHKARKO APP

App Store
Google Play

Institucionet e drejtësisë i bëjnë bllok komisionit “Xhafaj”

3 Tetor 2024, 15:08, Aktualitet CNA

Institucionet e drejtësisë i bëjnë bllok komisionit

Institucionet e Drejtësisë kanë reaguar në unison duke bërë me dije se nuk do të bëhen pjesë e aktivitetit të komisionit Xhafaj.

Fillimisht ishte Gjykata Kushtetuese e cila nuk pranoi të bëhej pjesë e mbledhjes së komisionit Xhafaj.

Kryetarja e Gjykatës Kushtetuese, Holta Zaçaj, ka deklaruar se nuk do të dërgojë ekspertë dhe përfaqësues.

“Nuk marrim pjesë në aktivitete ligjbërëse”, ka deklaruar Zaçaj.

Pas Gjykatës Kushtetuese ditën e sotme ka reaguar dhe prokurorët e SPAK të cilët janë shprehur se nuk e shohin të arsyeshme që të marrin pjesë pasi problematikat e tyre i kanë bërë publike.

Nuk e kanë detyrim për të qenë të tillë pasi që është kryeprokurori i këtij institucioni që mund të marrë pjesë, por SPAK-u është dhe para një detyre shumë të vështirë nuk mund të shkojë të pyetet dhe të japë llogari para Fatmir Xhafaj, i cili është vëllai i Geron Xhafajt i ekstraduar për trafikim droge në Itali.

"Në përgjigje të interesimit tuaj, ju bëjmë me dije se kërkesa e Komisionit të Posaçëm Parlamentar 'Për Thellimin e Reformave për Mirëqeverisjen, Sundimin e Ligjit, dhe Antikorrupsionin për Shqipërinë 2030 në Bashkimin Evropian' (Komisioni), u analizua me shumë kujdes nga ana jonë duke u trajtuar në Mbledhjen e Prokurorëve të Posaçëm të datës 03.09.2024.

Gjatë kësaj mbledhjeje, Prokurorët e Posaçëm diskutuan rëndësinë e bashkëpunimit me Kuvendin për përmirësimin e sundimit të ligjit dhe luftën kundër korrupsionit dhe krimit të organizuar, gjithmonë duke respektuar parimin e ndarjes dhe balancimit të pushteteve.

Në mënyrë unanime të gjithë Prokurorët e Posaçëm nuk e konsideruan të nevojshme pjesëmarrjen me ekspert në këtë Komision, pasi vlerësuan se tashmë institucioni ynë i ka përmbushur detyrimet ligjore për bërjen publike të problematikave të hasura gjatë ushtrimit të funksioneve të tij duke përfshirë këtu dhe nevojat për ndryshime ligjore përkatëse.

Ky detyrim ligjor është realizuar përmes publikimit të  Raporteve Vjetore të SPAK në faqen zyrtare, si dhe raportimeve periodike përballë KLP-së dhe Kuvendit.  Nga ana tjetër, Prokuroria e Posaçme, cilësoi se është e gatshme për të  ofruar kontributin e saj  përmes dhënies së mendimeve ligjore sa herë që do të konsiderohet e nevojshme nga ky Komision", thuhet në njoftimin e SPAK-ut për mediat.

Së fundi ka reaguar dhe ILD dhe Gjykata e Lartë, institucione të cilat kanë deklaruar se nuk do ta marrin pjesë në mbledhjet e komisionit Xhafaj.

“Kërkesa nuk përshtatet me funksionin tonë”, është shprehur Gjykata e Lartë.

Pra të gjitha institucionet e drejtësisë unanimisht kanë vendosur që të mos bëhen pjesë e komisionit Xhafaj i cili qëllimin e vetëm e ka të pengojë dhe ndalojë punën e SPAK.

Ky është një dështim i komisionit “Xhafaj” pasi asnjë nga institucionet e drejtësisë nuk do i bindet dhe nuk do të japë llogari para Fatmir Xhafajt./ CNA





Lajmet e fundit nga