Skemë mashtrimi me “Fondin Besa”/ Si merreshin kredi me të dhënat e qytetarëve pa dijeninë e tyre

3 Qershor 2024, 15:40, Aktualitet CNA

Prokuroria e Tiranës ka zbuluar një skemë mashtrimi me kreditë e qytetarëve, ku është i përfshirë edhe “Fondi Besa”.

5 persona, konkretisht një qytetar, një notere dhe 3 punonjës të “Fondit Besa”, kanë marrë kredi për 11 shtetas të ndryshëm dhe kanë përvetësuar paratë.

Shtetasi L.V., ka shtyrë 11 qytetarë që të hapnin llogari bankare në emër të tyre, ku janë transferuar shumat monetare të marra nëpërmjet kredive bankare. Po kështu, shtetasi L.V., nëpërmjet gënjeshtrës dhe shpërdorimit të besimit ka siguruar kopje të dokumenteve të identifikimit për personat e dëmtuar dhe pa dijeninë e tyre, ka bërë të mundur realizimin e dosjeve dhe kontratave të kredisë, në institucionin financiar ‘Fondi Besa’ sh.a.

Pas çeljes së kredive, disbursimit dhe transferimit të shumave monetare në llogaritë bankare të 11 qytetarëve, 34-vjeçari me iniciale L. V. ka tërhequr dhe përvetësuar paratë.

Mashtronin qytetarët dhe merrnin kredi me të dhënat e tyre/ Kapen 4 persona, një në kërkim
3 Qershor, 15:22

Sipas prokurorisë, 34-vjeçari ka bashkëpunuar oficerët e kredisë në shoqërinë “Fondi Besa’” sh.a, E. A. dhe L. P. për të realizuar këtë skemë mashtrimi. Gjithashtu, më shtetasin L. V. ka bashkëpunuar edhe përgjegjësja e zyrës përkatëse te ‘Fondi Besa’ sh.a, L. N., që ka pasur në varësi dy punonjësit e mësipërm.

“Personat e dëmtuar nuk janë paraqitur ndonjëherë në zyrat e institucionit financiar ‘Fondi Besa’ sh.a, nuk kanë nënshkruar ndonjë dokument për marrjen e kredive, nuk kanë nënshkruar kontratat noteriale për marrjen e kredive, nuk kanë pasur dijeni në lidhje me ekzistencën e kredive në emër të tyre. Punonjësit e institucionit financiar ‘Fondi Besa’ sh.a kanë qënë plotësisht në dijeni të faktit se personat e dëmtuar nuk janë paraqitur në zyrat e tyre, për të aplikuar për kredi dhe për të dorëzuar dokumentacionin e kredisë, por kanë plotësuar dosjen e aplikuesve me dokumente me përmbajtje të falsifikuar.

Sa më sipër, ekzistojnë prova të mjaftueshme se shtetasi L. V., në bashkëpunim me shtetaset L.N., E.A. dhe L.P., kanë kryer veprën penale të "Mashtrimit", me pasoja të rënda dhe të kryer në bashkëpunim, të parashikuar nga nenet 143/3 dhe 25 të Kodit Penal”, thuhet ndër të tjera në njoftimin e prokurorisë së Tiranës.

Skemë mashtrimi me “Fondin Besa”/ Si merreshin kredi me të

Prokuroria e Tiranës

Po kështu, ekzistojnë prova të mjaftueshme se noterja M. D., ka kryer veprën penale të ‘Falsifikimi i dokumenteve’, nga personi që e ka për detyrë, në 11 raste.

Në përfundim, Prokuroria pranë Gjykatës së Shkallës së Parë të Juridiksionit të Përgjithshëm Tiranë, ka kërkuar:

- Të caktohet ndaj personit nën hetim L.V., masa shtrënguese e sigurimit personal "arrest në burg", parashikuar nga neni 238 i K.Pr.Penale;

- Të caktohet ndaj personave nën hetim L.N., E.A., L.P. dhe M.D., masa shtrënguese e sigurimit personal "arrest në shtëpi", parashikuar nga neni 237 i K.Pr.Penale;

- Të caktohet ndaj personit nën hetim M.D. edhe masa ndaluese “Pezullim i ushtrimit të një detyre a shërbimi publik” parashikuar nga neni 242 i K.Pr.Penale./ CNA