"Sidomos shprehja kombëtare TQR"/ Ish-deputeti-komentuesve: T'u ndodhin ato që më keni uruar

29 Qershor 2026, 11:26, Aktualitet CNA

"Sidomos shprehja kombëtare TQR"/ Ish-deputeti-komentuesve:

Ish-deputeti i Partisë Demokratike, Edmond Spaho, ka bërë një reagim për ata që e kanë sulmuar pas deklaratës së tij për dorëheqjen e Ramës.

Me anë të një postimi në rrjetet sociale, Spaho shkruan se militantët e PD-së i kthehen atij me ofendime, ndërsa janë të paaftë të marrin pushtetin me votë. Ish-deputeti shprehet se PD është kthyer në një parti komike.

Ndërsa, sa u përket komentuesve që e kanë fyer dhe ofenduar pas atij reagimi, Spaho shkruan se nuk duhet të lexojnë vetëm titullin e atij reagimi, por dhe të shkojnë më në brendësi të shkrimit.

Ai thotë se nuk pretendon asnjë karrige apo post dhe nuk do të kthehet më në politikë.

Reagimi i Spahos

Çfarë më kënaq më shumë në fb kur bëj postime, është lukunia e sharësve profesionistë, idiotëve, trushkulurve, militantëve me diarre nga goja, të ashtuquajturit intelektualë, të cilët pretendojnë që të njohin me dhëmbë e dhëmballë dhe japin hazër xhevap cilësimin për ty.

Më bëri përshtypje një mik imi i cili përdori në fb një fjalor jashtëzakonisht vulgar, sepse u ndje keq ngaqë i thashë Ramës mos u dorëhiq ngaqë duan flamingot që kanë dalë në bulevard.

Po edhe nëse ti e bën dhëmbin sa gishti, Rama nuk ta lëshon pushtetin se duan flamingot, mor i shkretë.

Pushteti merret me votë.

Të paaftë për të marrë pushtetin me votë, militantët e PD, më lëshohen mua, sikur unë po ju heq mundësinë të rikthehen në pushtet. O zot përse kjo parti është bërë kaq komike?

Në të vërtetë po shkruaj për një takëm tjetër, që as më njohin e as i njoh. Ata me lehtësinë më të madhe që u jep fb, të thonë hajdut, tradhëtar, agjent 35 vjeçar i Ramës që po kërkon karrige prej tij, sigurims, na ke rrjepur 20 vjet duke marrë rrogën e deputetit, tqr, ropt ku ti kesh, çfarë të mban pragu i shtëpisë, etj. etj.

Një përfaqësuesi të tillë që as më njeh e as e njoh, anonim në të dhënat e tij, por pak më i moderuar se sharësat e ndyrë dhe që përpiqej të "argumentonte" çfarë plehre jam unë, i dhashë përgjigjen e mëposhtme:

Ermir Armin mos lexo vetëm titullin si ajo intelektualja-ish zyrtare e Edi Ramës, që dikur qante për të dhe sot revoltohet e shpreson që do i rikthehen ditët e arta të pushtetit si anëtare e Asamblesë së 500 Petritave të Republikës së Re.

Të lutem mos përto, avash avash zbrit pak më poshtë e lexo ca rreshta më shumë.

Më pas vëre mendjen, qoftë edhe pak në punë, që të kuptosh se çfarë kam thënë. Po nuk e vrave pak mendjen, kupton vetëm mendjen tënde Ermir.

Ato çfarë kam vjedhur e zhvatur ti i di më mirë se unë, sepse nuk më njeh fare. Më shumë nga të tjerët duhet të kem vjedhur ty, sepse çfaqesh shumë i revoltuar. Më thuaj çfarë të kam vjedhur, sepse jam hajdut me ndërgjegje dhe do t’i kthej të gjitha.

E bën për të vazhduar të rrish në karrige më the. Po në çfarë karrige dua unë të vazhdoj të rri more i shkretë? Unë kam dhënë dorëheqje dhe kam dalë në pension dhe nuk kthehem më në çfarëdolloj funksioni në politikë sepse kam shpëtuar.

Ermir pyete veten se çfarë do ishe ti po të mos kishe fb? Si do jetoje ti pa zbrazur vrerin, inatin, xhelozinë, smirën të cilat sot të japin energjinë të shash sa mbarë prapë dhe të na premtosh Shqipërinë e Re me udhëheqës kokëboshë dhe të vjetër në mendime.

Aman më shuaj një kuriozitet, veç përgjigju drejt, mos më dredho: sa herë e ke votuar Edi Ramën? Nuk e vë dorën në zjarr që e ke votuar në të gjitha zgjedhjet që janë bërë, por ca herë së fundi e ke votuar.

Të fala të gjithë atyre në këtë faqe që më shajnë, më ofendojnë, më mallkojnë, më sh.erdhejnë tërë ropt e shtëpisë ngaqë nuk kanë mundësi tjetër si ta zbrazin vrerin dhe instiktet kafshërore, përveçse në fb.

Edhe unë ju uroj cilit do të këtij takëmi, t’ju ndodhin të njëjtat gjëra në familjet e tyre, si ato që më kanë uruar mua. Sidomos ajo shprehja kombëtare shqiptare TQR. Ju siguroj që ekzekutuesi i urimeve nuk do jem unë.

Tung Ermir, përpiqu të punosh sepse fb nuk të jep bukë. Mos më shih mua se unë pensionist jam.