web counter
LEXO PA REKLAMA!

SHKARKO APP

App Store
Google Play

E fundit!

x

"SafeJournalists" dhe MFRR ngrenë shqetësimin/ "Po sulmohen KSHM, SCiDEV dhe Blerjana Bino"

8 Tetor 2024, 13:11, Aktualitet CNA
"SafeJournalists" dhe MFRR ngrenë shqetësimin/ "Po
Foto ilustruese

Rrjeti "SafeJournalists" dhe "Media Freedom Rapid Response" kanë dalë në mbështetje të Këshillit të Etikës së Medias në Shqipëri (KSHM), qendrës së mendimit – SCiDEV dhe kërkueses Blerjana Bino.

"SafeJournalists" dhe MFRR deklarojnë se këto dy platforma dhe Bino u bënë objektive të fushatave shpifëse nga "Sot.com.al" dhe "Prapaskena.com", si përgjigje ndaj publikimit të një raporti hije mbi lirinë e medias në Shqipëri.

"SafeJournalists" dhe MFRR shprehen se këto incidente shënojnë një prirje shqetësuese të armiqësisë ndaj mediave të pavarura dhe organizatave të shoqërisë civile.

Rrjeti "SafeJournalists" dhe MFRR bëjnë thirrje për një ndërprerje të menjëhershme të këtyre sulmeve.

Deklarata e plotë:

Rrjeti SafeJournalists dhe Media Freedom Rapid Response (MFRR) dënojnë ashpër fushatat shpifse ndaj Këshillit të Etikës së Medias në Shqipëri (KSHM) dhe qendrës së mendimit – SCiDEV që kanë publikuar një raport hije mbi lirinë e medias në Shqipëri, si dhe ndaj kërkueses Blerjana Bino.

Në fillim të tetorit 2024, Këshilli i Etikës së Medias në Shqipëri (KSHM) u bë objektiv i fushatave shpifse të koordinuara nga dy platformat online, Sot.com.al dhe Prapaskena.com. Këto incidente shënojnë një prirje shqetësuese të armiqësisë ndaj mediave të pavarura dhe organizatave të shoqërisë civile, duke rritur shqetësimet midis advokuesve për lirinë e medias.

Më 6 tetor, Prapaskena.com përshkallëzoi sulmet duke vënë në shënjestër Blerjana Bino, kërkuese e rrjetit SafeJournalists dhe drejtore ekzekutive e SCiDEV, së bashku me dy organizatat think tank  – SCiDEV dhe OBCT.  Sulmi erdhi si përgjigje ndaj publikimit të një raporti hije mbi lirinë e medias në Shqipëri.

I publikuar më 25 korrik, raporti u fokusua në seksionin e tretë të Raportit të Komisionit për Sundimin e Ligjit 2024, kushtuar lirisë dhe pluralizmit të medias, për të ofruar një analizë të përditësuar të peizazhit të medias shqiptare, duke përfshirë sfidat e mbetura dhe ato në zhvillim.

Prapaskena.com, duke shpifur e cilësoi Binon si “Merimangën” e fondeve të shoqërisë civile dhe e akuzoi atë në mënyrë të rreme për prodhimin e raporteve të njëanshme për sulmet ndaj gazetarëve. Fotografia e Binos, e përdorur për të ilustruar artikullin shpifës, rrezikoi gjithashtu sigurinë e Binos duke nxitur urrejtje kundër saj. Këto sulme shpifëse minojnë besueshmërinë e zërave dhe organizatave të pavarura që punojnë për të mbrojtur lirinë e medias dhe për të mbështetur gazetarinë etike në Shqipëri.

Sulmi fillestar, i nisur nga Sot.com.al, pasoi një vendim të Bordit të Etikës të KSHM-së në lidhje me një ankesë të depozituar kundër medias Sot. Në atë që dukej si një veprim hakmarrës, Sot.com.al e cilësoi vendimin e KSHM-së si shkelje të lirisë së shtypit, duke e portretizuar rolin e Bordit Etik si shtypës dhe të padrejtë. Kjo përgjigje jo vetëm që shtrembëron rolin e KSHM-së në promovimin e gazetarisë etike, por kërcënon gjithashtu integritetin e kuadrit vetërregullues të krijuar për të mbështetur standardet e medias. KSHM e dënoi ashpër artikullin si shpifës, duke nënvizuar një tendencë shqetësuese të hakmarrjes mediatike ndaj organeve vetë-rregullatore në vend që të angazhohej në mënyrë konstruktive me standardet etike në gazetari.

Njëkohësisht, Prapaskena.com nisi sulmin e saj, pak pasi KSHM lëshoi një deklaratë publike ku kundërshtonte mbylljen e rrjeteve sociale të një nga platformat online në Shqipëri. Duke i bërë jehonë retorikës së Sot.com.al, Prapaskena.com përdori gjuhë të ngjashme nxitëse për të diskredituar qëndrimin e KSHM-së, duke përshkallëzuar më tej fushatën kundër organizatave të pavarura që punojnë për gazetari etike në vend.

Këto sulme të koordinuara, të cilat synojnë të diskreditojnë gazetarinë etike dhe të minojnë punën e organizatave dhe studiuesve të pavarur në mbrojtjen e lirisë së medias dhe sigurisë së gazetarëve në Shqipëri, janë thellësisht shqetësuese dhe përfaqësojnë një prirje më të gjerë të frikësimit dhe armiqësisë ndaj shoqërisë civile të pavarur në Shqipëri. Taktika të tilla nuk janë vetëm një sulm ndaj individëve dhe organizatave të përfshira, por edhe ndaj parimeve thelbësore të lirisë së shtypit, transparencës dhe llogaridhënies që janë themelore për një shoqëri demokratike.

Rrjeti SafeJournalists dhe MFRR bëjnë thirrje për një ndërprerje të menjëhershme të këtyre sulmeve dhe nxisin të gjitha palët e interesuara të respektojnë rolin e organeve të pavarura vetërregulluese, organizatave think tank dhe studiuesve në promovimin e standardeve etike dhe transparencës në sektorin e medias. Ne mirëpresim dhe mbështesim shqyrtimin shkencor dhe dialogun e hapur për çështjet që lidhen me lirinë e medias dhe sigurinë e gazetarëve, për të forcuar më tej avancimin e përbashkët të këtyre temave.

Ne solidarizojmë me KSHM, SCiDEV, dhe Blerjana Bino dhe u bëjmë thirrje autoriteteve shqiptare të sigurojnë që media e pavarur dhe organizatat e shoqërisë civile të mund të kryejnë punën e tyre jetike pa frikë nga hakmarrja apo shpifja.

Gjithashtu, Rrjeti SafeJournalists mbron fuqishëm kolegen e saj Blerjana Bino dhe rikonfirmon mbështetjen e palëkundur për punën e saj kritike, profesionale dhe etike në avancimin e lirisë dhe transparencës së medias në Shqipëri.





Lajmet e fundit nga