“Ryanair”, goditje “Wizz Air”?/ Michael O’Leary: Do të marrë fund epoka e tarifave të larta në Shqipëri

26 Tetor 2023, 12:35, Aktualitet CNA

“Ryanair”, goditje “Wizz Air”?/ Michael O’Leary:

Michael O’Leary, drejtori i përgjithshëm i kompanisë “Ryanair”

Më 31 tetor do të nisë fluturimet linja më e re që ka ardhur në Shqipëri nga “Kastrati Group”, ndërsa deri më tani ka një numër rekord udhëtarësh që kanë blerë biletat në këtë kompani.

“Ryanair” raportoi se ka marrë prenotime rekord paraprakisht në 17 linjat e reja nga Tirana drejt destinacioneve të tjera dhe anasjelltas.

Me tarifat e avionit që fillojnë nga vetëm 15 euro, qytetarët mund të kryejnë udhëtime ditore në destinacionet drejt Londrës e Milanos apo anasjlltas, mund të marrin shërbime ditore për në Bolonja, Bruksel, Katania, Piza, Romë dhe Venecia.

“Ryanair” pritet t’i japë një goditje kompanisë “Wizz Air”, e cila njihet si një nga linjat ajrore që sjell shumë vonesa dhe problematika për udhëtarët.

Linja numër 1 në Europë/ Kastrati Group sjell “Ryanair”, revolucion i çmimeve të ulëta, nis fluturimet në 31 Tetor
25 Tetor, 20:36

Këtë gjë e ka paralajmëruar edhe Michael O’Leary, drejtori i përgjithshëm i kompanisë.

“Për një kohë të gjatë, rritja e rrugëve të reja dhe trafikut në Shqipëri është penguar nga linjat ajrore ekzistuese me tarifa të larta. Nga e marta e ardhshme 31 tetor, kjo epokë e tarifave të larta përfundon. Tarifat e ulëta të ‘Ryanair’ po vijnë në Tiranë. Mijëra vizitorë po vijnë në Tiranë dhe ne mezi presim të sjellim mijëra qytetarë shqiptarë në/nga Evropa për të vizituar miqtë dhe të afërmit e tyre”, deklaroi ai.

Drejtori i kompanisë u shpreh se "Ryanair" është e vetmja linjë ajrore kryesore në Evropë që ka rikuperuar në 130% të trafikut të saj para COVID-it.

“Jemi krenarë që hapim 17 linja të reja drejt/nga Tirana javën e ardhshme dhe jemi të emocionuar me fuqinë e rezervimeve të para, dhe kërkesën që ekziston në Shqipëri dhe në mbarë Evropën për fluturimet me tarifa të ulëta të 'Ryanair' për/nga Tirana. 'Ryanair' planifikon të rrisë flotën e saj në 800 avionë dhe trafikun e saj në 300 milion pasagjerë p.a. gjatë dekadës së ardhshme dhe ne besojmë se Shqipëria do të jetë një treg kyç në rritje për tarifat e ulëta të 'Ryanair'”, përfundoi O’Leary./ CNA