Raporti i OECD-së: Shqipëria, larg BE-së dhe e fundit në rajon për aftësitë digjitale

18 Shtator 2024, 09:30, Aktualitet CNA

Raporti i OECD-së: Shqipëria, larg BE-së dhe e fundit në

Shqipëria, përveçse mbetet larg mesatares së Bashkimit Europian sa i takon treguesit që lidhet me aftësitë digjitale bazike apo përtej bazike tek individët mbetet gjithashtu performuesi më i keq në rajon.

Një raport i fundit i Organizatës për Bashkëpunim Ekonomik dhe Zhvillim(OECD) “Ballkani Perëndimor, Perspektiva e Konkurrueshmërisë 2024: Profili Rajonal” ndalet ndër të tjera edhe tek aftësitë digjitale të vendeve të Ballkanit Perëndimor ku rezulton se në krye të listës qëndron Mali i Zi dhe në fund të saj Kosova e më pas Shqipëria.

Sipas raportit teksa ekonomitë e Ballkanit Perëndimor nisin tranzicionin e gjelbër dhe atë digjital, sistemet e tyre të aftësive duhet të parashikojnë nevojat për aftësi në të ardhmen.

Kjo përfshin krijimin e infrastrukturës së duhur për edukim dhe trajnim për zhvillimin dhe përshtatjen e aftësive që mundësojnë dhe mbështesin këto tranzicione.

“Aktualisht, zhvillimi i aftësive digjitale në rajon tregon konvergjencë të kufizuar drejt niveleve të BE-së, me përqindjen e individëve në ekonomitë e Ballkanit Perëndimor që zotërojnë aftësi digjitale bazike të paktën 20 për qind më të ulëta se në BE.

Megjithatë, ndërsa të gjitha ekonomitë bien nën mesataren e BE-së, ka ndryshime të konsiderueshme: Mali i Zi është performuesi më i mirë i rajonit, me vetëm 7 pikë përqindjeje larg nga nivelet BE nivelet, ndërsa Shqipëria dhe Kosova raportuan norma më pak se 30% – në thelb gjysma e niveleve të BE-së.

Kjo zbulon nevojën universale për të vazhduar përmirësimin dhe zhvillimin e këtyre aftësive mes studentëve dhe fuqisë punëtore në rajon duke marrë parasysh pozicionin unik të secilës ekonomi”, thuhet në raport.

Parë në shifra raporti vlerëson se mesatarja e individëve që kanë aftësi bazike apo mbi bazike digjitale në vendet e Bashkimit Europian përbën 53.9 për qind të tyre. Në Malin e Zi kjo përqindje është 47.2 për qind e individëve, në Serbi 41.3 për qind teksa në Shqipëri kjo vlen për 23.8 për qind të individëve.

Raporti vëren se tashmë vendet janë përfshirë në kurrikulat shkollore aspekte të rëndësishme të digjitalizimit dhe kjo qasje jo vetëm lehtëson mundësinë që studentët apo nxënësit të përqafojnë këto aftësi, por edhe zgjeron mundësitë e aplikimit të tyre gjerësisht.

“Kurset e TIK-ut dhe zhvillimit të aftësive digjitale janë të përfshira kryesisht në kurrikulat si në fillore ashtu edhe në ato të arsimit të mesëm në gjithë rajonin.

Shumica e ekonomive e kanë bërë të detyrueshme për studentët që të plotësojnë klasat përkatëse të TIK-ut, duke filluar nga shkenca kompjuterike në Serbi dhe kodimi në Shqipëri deri tek informatika te Mali i Zi dhe Maqedonia e Veriut.

Përtej këtyre, Shqipëria, Mali i Zi dhe Serbia kanë integruar zhvillimin e aftësive digjitale nëpër lëndë të ndryshme në kurrikulat e tyre”, vlerëson raporti i OECD./ Revista Monitor