web counter
LEXO PA REKLAMA!

SHKARKO APP

App Store
Google Play

E fundit!

x

Jamarbër Malltezi: Jam i burgosur politik

17 Shtator 2024, 14:26, Aktualitet CNA
Jamarbër Malltezi: Jam i burgosur politik
Jamarbër Malltezi, drejtuesi i Departamentit të Mjedisit në PD

Drejtuesi i Departamentit të Mjedisit në PD, Jamarbër Malltezi, ka folur për akuzat e SPAK-ut ndaj tij për çështjen "Partizani", ku akuzohet për korrupsion aktiv.

Në një deklaratë për mediat, Malltezi është shprehur se është një i burgosur politik me urdhër të kryeministrit Edi Rama.

“Le të shohim një nga thagmat e radhës të shprehjeve të prokurorëve politikë, shërbyes të Edi Ramës në aktakuzën e tyre.

Qysh në faqen 3 kanë bërë një shënim, koment politik, në të cilin thonë se Jamarbër Malltezi shfaqet si një person i pushtetshëm, por në asnjë pjesë të aktakuzës nuk kanë asnjë dokument, asnjë letër të Jamarbër Malltezit në asnjë nga institucionet e shtetit shqiptar deri në 2009 që ka mbaruar procesi.

Interesante është që në asnjërën nga faqet e akuzës nuk ka asnjë dëshmi, nuk del asnjë njeri që të thotë se Sali Berisha, apo Jamarbër Malltezi kanë bërë presion për çfarëdolloj gjëje.

Më pas për të mbështetur argumentin e tyre, komentin politik të Edi Ramës, thonë: veprimet janë kryer me shpejtësi.

Ky është një mashtrim tjetër sipas urdhrit politik.

Le të shohim procesin e kthimit të pronës.

Ky është dokumenti i njohjes dhe kthimit të pronës së familjes Begeja qysh në vitin 1996. Ka pasur edhe kthim pjesor, edhe njohje. Dhe ky është vendimi final i 2007. Pra, 12 vjet për një person të pushtetshëm për t’i kthyer pronën.

Ndërkohë që ligji ka pasur afate 2 dhe 3-mujore për përgjigjen e këtyre.

Të merremi me privatizimin e këtyre objekteve. Privatizimi i këtyre objekteve ka filluar nga shkresat e ministrit Anastas Angjeli për fillimin e procedurave të privatizimit dhe përgjigjen e ministrit Blendi Klosi, që bien dakord qysh në korrik të vitit 2005. Thotë: shprehemi dakord për fillimin e procedurave.

Por kur ka përfunduar kjo?

Pra, nga korriku 2005. Njëri klub ka përfunduar në nëntor 2008 dhe tjetri në nëntor 2009. Pra, për mbi 3 dhe për mbi 4 vjet.

Janë bërë procedurat shpejt, sipas prokurorëve politikë të nënshtruar nga SPAK-u.

Unë jam 1 në 510 mijë shqiptarë të cilëve u është kthyer toka e vjedhur padrejtësisht nga shteti komunist shqiptar. Më është kthyer më pak se 1%, vetëm 410 metra. Por unë jam i burgosur politik, sepse kështu ka urdhëruar Edi Rama dhe falangat e Sorosit në drejtësi.

Pse gënjeu SPAK-u, pra? Pse tha SPAK-u që janë bërë shpejt, kur procesi i kthimit të pronës ka marrë 12 vjet, ndërsa privatizimi për mbi 4 vjet.

Çfarë halli i shtyu këta prokurorë shërbyes të Edi Ramës të gënjejnë?”, tha Malltezi./ CNA





Lajmet e fundit nga