E fundit!

07:30 Horoskopi

Horoskopi i ditës, e mërkurë 15 korrik 2026

Dashi Ruani qetësinë në marrëdhënie dhe shmangni reagimet...

Qarku Korçë/ Reshjet e shiut shkaktojnë dëme, situata në monitorim

22 Nëntor 2025, 10:35, Aktualitet CNA

Qarku Korçë/ Reshjet e shiut shkaktojnë dëme, situata

Reshjet e vazhdueshme të shiut gjatë natës dhe orëve të para të mëngjesit kanë shkaktuar disa problematika në Qarkun Korçë, duke prekur banesa, rrugë dhe ura në disa bashki. Strukturat vendore dhe ekipet e emergjencave janë në terren për ndërhyrje dhe monitorim të situatës.

Situata sipas bashkive:

Bashkia Korçë: Situata paraqitet drejt normalizimit në njësitë administrative Bulgarec, Vithkuq, Drenovë dhe Mollaj, pasi uji është tërhequr.

Bashkia Kolonjë: Urat në Qafëzez dhe Qinam janë ende të bllokuara, por niveli i ujit po ulet. Inertet në rrugët rurale po pastrohen.

Bashkia Maliq: Po vazhdojnë punimet për mbylljen e çarjeve në argjinaturat e lumit Devoll dhe lumit Dunavec. Banorët e fshatrave Moçan, Desmire, Osoje dhe Gjinikas janë të bllokuar për shkak të shembjes së urave. Në fshatrat Senisht dhe Dolan ka rrëshqitje dherash që rrezikojnë banesa.

Bashkia Pustec: Situata e qetë, ndërhyrje për largimin e ujit nga bodrumet në banesa.

Bashkia Devoll: Uji është tërhequr në fshatrat Proger dhe Macurisht, ndërsa personi i humbur është gjetur. Një segment rrugor në Miras mbetet i bllokuar nga rrëshqitja e dherave.

Bashkia Pogradec: Rreth 50 banesa të dëmtuara, 5 ura të dëmtuara dhe përmbytje në 3.5 ha tokë të mbjellë. Hidrovori Tushemisht funksionon normalisht.

Energjia elektrike dhe qarkullimi rrugor:

Në rajonin Korçë, disa fidera janë jashtë funksionit, duke prekur qindra abonentë në zonat rurale, por ekipet e OSHEE-së janë në gatishmëri për riparim.

Qarkullimi rrugor në akset kryesore si Korçë–Ersekë, Zemblak–Goricë dhe Bilisht–Miras është normal, përveç urës lidhëse Qinam–Selenicë, e cila mbetet e bllokuar.

Strukturat vendore dhe forcat e emergjencave po punojnë për riparimin e dëmeve në ura, argjinatura dhe rrugë rurale, si dhe për largimin e ujërave nga parcelat bujqësore dhe banesat e prekura. Puna vazhdon për të garantuar sigurinë e banorëve dhe funksionimin e infrastrukturës kritike./ CNA