Protesta e 21-të/ Emigranti për deklaratat e Ramës: Vijmë me makina të shtrenjta se i kemi duart me kallo

20 Qershor 2026, 20:27, Aktualitet CNA

Protesta e 21-të/ Emigranti për deklaratat e Ramës: Vijmë me

Vijon prej gati dy orësh protesta para Kryeministrisë me thirrje për dorëheqjen e kryeministrit Edi Rama. Pjesë e tubimit të sotëm është bërë edhe diaspora, ku mijëra emigrantë kanë ardhur në Tiranë për të protestuar.

Disa prej tyre kanë mbajtur dhe fjalime para protestuesve. Një emigrant që vinte nga Londra ka komentuar edhe deklaratat e Ramës për pjesëmarrjen e tyre në protestë.

“Sot Rama na ka ironizuar duke thënë se po vijmë me makina luksoze. Po zoti kryeministër, hajdut i kombit. Ne ikëm me gomone dhe vijmë me makina të shtrenjta se i kemi duart me kallo”, tha emigranti.

Një prej qytetarëve, ka bërë thirrje që Rama të largohet brenda 24 orëve dhe të krijohet një qeveri teknike për 12 muaj.

“Ju rrezatoni shpresë, ndryshim, revolucion… Në të gjitha protestat që kemi bërë në Londër kemi kërkuar dorëheqje. Kjo është një lëvizje qytetare për reforma demokratizuese. Nga Britania i kërkojmë Ramës dorëheqjen dhe një qeveri teknike për 12 muaj, që të garantojë ndryshime në Kodin Elektoral dhe lista të hapura. Ramën e sfidoj: jep dorëheqjen deri më 21 qershor”, tha qytetari.

Një tjetër që vinte nga Gjermania tha se ishte zhgënjyer nga Partia Socialiste për të cilën tha së dhe kishte votuar.

“Vij nga gjermania. Kemi dy ditë rrugë për të ardhur këtu dhe thënë këtij kryeministri se nuk e keni tapi kryeministrinë. Unë kam qenë mbështetës i tij, iu kërkoj ndjesë pukjanëve që kam dhënë 7 mijë për këtë parti dhe asnjë nga ne nuk është përfaqësues. Janë halabakë, kriminelë, shushunja, hajdutët më të mëdhenj. Jam zhgënjyer. Poshtë diktatura”, u shpreh emigranti. /CNA