E fundit!

11:00 Aktualitet

Vijojnë përplasjet në kantierin e aeroportit të Vlorës/ Kërkohet ndërhyrja e policisë, reagon Behgjet Pacolli

Vazhdojnë tensionet në kantierin e aeroportit të Vlorës. P...

Përballja e Adnan Xholit në KLP për garën e drejtuesit të ri të SPAK-ut/ "Suksesi i prokurorit matet në gjykatë"

11 Dhjetor 2025, 09:41, Aktualitet CNA

Përballja e Adnan Xholit në KLP për garën e drejtuesit

Në seancën dëgjimore në Këshillin e Lartë të Prokurorisë, kandidati për drejtues të SPAK-ut, Adnan Xholi, paraqiti platformën e tij të drejtuar ndaj rritjes së efikasitetit në hetime, rezultateve konkrete dhe transparencës ndaj publikut.

Xholi theksoi se përballja me opinionin publik duhet të jetë e bazuar në rezultate, duke garantuar hetime të shpejta dhe prova të pakundërshtueshme në gjykatë. Ai nënvizoi se sjell me vete 27 vite eksperiencë, mes të cilave 16 vite si drejtues në struktura të ndryshme të prokurorisë, periudhë që sipas tij i ka dhënë mundësinë të menaxhojë situata të vështira dhe t’u japë zgjidhje konkrete.

Gjatë prezantimit, ai kujtoi se ka përfaqësuar prokurorinë në tri shkallët e gjykimit dhe ka punuar për tetë vite në Prokurorinë e Përgjithshme, duke qenë pjesë e vendimmarrjeve të rëndësishme gjyqësore.

Xholi theksoi eksperiencën e tij në hartimin e akteve dhe rregulloreve, si dhe angazhimin për të mbledhur problematikat nga kolegët për të krijuar mekanizma funksionalë zgjidhjeje. Ai renditi si pika të forta ekspertizën ligjore, aftësinë në menaxhimin dhe drejtimin e strukturave hetimore, si dhe drejtimin e pesë skuadrave të përbashkëta hetimore me Francën, Gjermaninë, SHBA-në dhe Britaninë.

Në karrierën e tij, tha ai, është angazhuar në hetime të rëndësishme për trafikun e lëndëve narkotike, pastrimin e parave dhe trafikun e qenieve njerëzore, duke bashkëpunuar në goditjen e grupeve kriminale ndërkombëtare dhe në përballje me subjekte me rrezikshmëri të lartë shoqërore.

Xholi u ndal edhe te roli i drejtuesit të SPAK-ut, duke theksuar se ky funksion kërkon shembull personal, përgjegjësi të shtuar dhe integritet. Ai shtoi se suksesi i prokurorit nuk matet nga numri i procedimeve, por nga rezultatet në gjykatë.

Në mbyllje, kandidati deklaroi se nëse merr besimin e KLP-së, do të vërë në dispozicion ekspertizën e tij të spikatur, aftësitë menaxheriale dhe përvojën e gjerë në çështjet e korrupsionit, krimit të organizuar dhe dosjeve sensitive, përfshirë ato të vitit 1997./ CNA