web counter
LEXO PA REKLAMA!

SHKARKO APP

App Store
Google Play

E fundit!

x

Rritja e çmimit të druve të zjarrit/ Pensionistët ngrenë shqetësimin: Asnjë ndihmë nga shteti

4 Nëntor 2024, 10:45, Aktualitet CNA

Rritja e çmimit të druve të zjarrit/ Pensionistët

Në juglindje, pjesa më e madhe e familjeve sigurojnë ngrohjen nëpërmjet druve të zjarrit për të përballuar temperaturat e ulëta gjatë dimrit.

Grupmoshat më në vështirësi për të siguruar drutë e zjarrit mbeten pensionistët dhe personat, të cilët jetojnë vetëm në shtëpitë e tyre duke mos pasur mundësi dhe ndihmë nga të tjerë.

Familjet i sigurojnë drutë e zjarrit që në verë, ndërsa tani që jemi në muajin nëntor, ka edhe familje që kanë vendosur të mos i blejnë më për të kursyer pak të ardhura, duke zgjedhur të ngrohen me kondicioner dhe pajisje të tjera të energjisë elektrike.

CNA TV, nëpërmjet intervistave me pensionistë, nxjerr në pah pamundësinë e tyre me pensionet qesharake për të blerë drutë e zjarrit, ndërsa ngrenë supet kur i pyesim për ndihmën që kanë nga shteti.

Të moshuarit tregojnë se zgjidhja më e mirë është të ngrohen me korrent sepse mund ta mbyllësh në çdo moment, ndërsa drutë e zjarrit do të digjen.

"Unë nuk përdor dru, ngrohem me korrent. Më mirë me korrent se ikën dhe e mbyll, ndërsa drutë do digjen. Dru s'kam marrë asnjëherë."

Ata thonë se edhe rritja prej 4.1% e pensioneve është e papërfillshme, ndërsa sa i përket ngrohjes me dru zjarri nuk i blejnë gjallë në botë.

"Ne nuk kemi mundësi t’i blejmë vetë sepse pensionet tona në përgjithësi, më shumë se 100-120 mijë nuk marrin dot. Ky na e ngriti 4 mijë lekë, u rrit dhe çdo kategori buke me 100-200 lekë. 30 ditë nga 200 lekë janë 6 mijë lekë, ai na dha 4 mijë, i bie që jam minus nga pensioni që kisha. Drutë jo, jo gjallë në botë, me kuvertë e me pak korrent se nuk arrijmë dot. S'është më mirë me korrent po mbulohemi me kuvertë e presim të na dërgojnë fëmija."

Ka pensionistë, të cilët jetojnë vetëm, me një pension që u ngelet shumë pak për ushqime pasi pjesën tjetër e harxhojnë me ilaçe.

"Ku kam lekë unë të marr dru, jam vetëm se gruaja më ka vdekur. Kam mundësi unë të marr? Djali më ka vënë kondicioner, njëherë e shuaj, njëherë e ndez. Nuk e marr dot 60 mijë unë metrin e druve. Me pensionin tim, po të heq harxhet më ngelen 70 mijë lekë, çfarë të ha unë me aq gjithë muajin?"

"Me se t’i marr drutë? Vetëm jam. Si ia bëj, ja ashtu me të keq. 53 mijë ka vajtur metri, e t’i shkurtosh 54. Si ta përballoj? 30 mijë lekë paguaj ujë e drita, aq më mbeten. Jam dhe me ilaçe. Ç'të bëj?"

Falë ndihmës së fëmijëve të tyre, ka pensionistë të cilët edhe këtë dimër do ta kalojnë me zjarr, por këta të fundit janë në numër shumë të ulët.

"Drutë m’i ka blerë djali po s’e di me sa i bleu. Unë të thashë çfarë kam, këto (rrobat) edhe pensionin."

Thuajse çdo vit në Korçë, çmimi i druve të zjarrit ka pasur rritje me deri 200 lekë të rinj për metër kub. Këtë vit, një metër kub arrin deri në 60 mijë lekë të vjetër çka e vështirëson akoma më shumë sigurimin e druve për moshat e treta./ CNA





Lajmet e fundit nga