Peleshi nga Korça: Rritja e pensioneve si prioritet kombëtar për Shqipërinë 2030

22 Tetor 2024, 21:21, Aktualitet CNA

Peleshi nga Korça: Rritja e pensioneve si prioritet kombëtar

Drejtuesi Politik i Qarkut të Korçës, Niko Peleshi

Qeveria shqiptare ka nisur një diskutim të gjerë publik me pensionistët për të adresuar një detyrim të kahershëm dhe një kërkesë legjitime për reformimin e skemës së pensioneve. Në këtë kuadër, Drejtuesi Politik i Qarkut të Korçës, Niko Peleshi, gjatë një takimi me pensionistët korçarë, theksoi se rritja e pensioneve nuk është më çështje indeksimi, por një reformë thelbësore që do të shfrytëzojë mundësitë që krijon rritja e ekonomisë për gjithë shoqërinë.

Në këtë takim, ku të pranishëm ishin edhe Sekretari i Përgjithshëm i Partisë Socialiste, Blendi Klosi, Kryebashkiaku i Korçës, Sotiraq Filo, dhe deputetja Eni Zake, Peleshi theksoi se qeveria po shqyrton një “rritje substanciale të bonuseve të fundvitit”, për të lehtësuar barrën financiare të përditshme të pensionistëve, duke përfituar nga rritja ekonomike e vendit. Ai përmendi se synimi kryesor është “një skemë pensioni e qëndrueshme që do garantojë në vazhdimësi pensione më të larta”.

“Në vitin 2013, gjetëm një mal me borxhe dhe u deshën vite për të stabilizuar financat e vendit. Nuk gjetëm para për të paguar pensionet e dhjetorit. Me ndihmën e Fondit Monetar Ndërkombëtar dhe përmes reformave, ia dolëm të stabilizonim ekonominë dhe sot kemi guximin të flasim për rritje pensionesh,” tha Peleshi. Ai theksoi se pensionistët nuk mund të mbeten të përjashtuar nga përfitimet e rritjes ekonomike dhe reformat që kanë transformuar vendin. “Ne kemi dyfishuar vëllimin e ekonomisë kombëtare, nga 12.7 miliardë euro në më shumë se 25 miliardë euro dhe kjo na ka dhënë mundësinë të bëjmë investime të mëdha dhe të përmirësojmë pagat e administratës publike. Është koha që edhe pensionistët të marrin atë që u takon”.

Peleshi nga Korça: Rritja e pensioneve si prioritet kombëtar

Peleshi nënvizoi se qeveria po punon për një reformë të thellë në skemën e pensioneve, duke u bazuar në kontributet e secilit. Ai theksoi rëndësinë e luftës kundër informalitetit, duke përmendur se shumë biznese nuk deklarojnë pagat reale, duke ulur kështu nivelin e kontributeve në skemën e sigurimeve shoqërore, që ndikon drejtpërdrejt në nivelin e pensioneve.

Sekretari i Përgjithshëm i Partisë Socialiste, Blendi Klosi, u shpreh se ky takim është një nga shumë të tjerë që do të pasojnë, për të nisur një dialog me pensionistët në të gjithë vendin. Ai nënvizoi se synimi për Shqipërinë 2030 është të arrijë standardet e BE-së, duke garantuar një ekonomi të fortë dhe më shumë mirëqenie për qytetarët.

“Ky është takimi i parë nga shumë të tjerë, për të takuar ata që realisht kanë përfituar më pak nga zhvillimi i vrullshëm i vendit,” u shpreh Klosi, duke shtuar se synimi i qeverisë është që, deri në vitin 2030, Shqipëria të arrijë standardet e BE-së dhe të garantojë një nivel më të lartë mirëqenieje për qytetarët e saj.

Takimet me pensionistët do të vazhdojnë në gjithë Shqipërinë për të diskutuar më tej reformën që synon të garantojë një pension të denjë për çdo qytetar./ CNA