Nën kontroll nga SPAK-u/ Si e bekoi Veliaj mikun e tij biznesmen me leje ndërtimi

13 Dhjetor 2024, 09:33, Aktualitet CNA

Nën kontroll nga SPAK-u/ Si e bekoi Veliaj mikun e tij biznesmen me leje

Gazetarja Ola Xama ka zbuluar të tjera detaje rreth lidhjes së Erion Veliajt me biznesmenin Elman Abule, ndaj të cilit SPAK-u ka ushtruar kontrolle.

Në një intervistë në "MCN TV", Xama tha se Abule, biznesmeni që njihet si mik i Veliajt, është bekuar me një leje ndërtimi nga Bashkia e Tiranës në zonën e Kombinatit në kohën kur kishte edhe protesta nga banorët.

Sipas gazetares, ajo që lidh fijet e shtetasit Elman Abule, me kryetarin e Bashkisë së Tiranës, është kompania "Fidalba", e themeluar që në vitin 2011, por për katër vite rresht nuk ka pasur asnjë aktivitet në shitje të materialeve dhe rezulton që në 10 janar 2024, kjo kompani, në pronësi të shtetasit Elman Abule, është subjekti ndërtues për një pallat 7-katësh në zonën e Kombinatit, ku ka pasur edhe një protestë lidhur me këtë pallat, nga banorët e Kombinatit dhe Lëvizja Bashkë, duke qenë se ishte lulishte.

“Nga të dhënat që kemi arritur të sigurojmë, sipas pistave të hetimeve që dyshon SPAK-u, rezulton se shtetasi Elman Abule zotëron 6 kompani në Shqipëri, në fushën e përpunimit të metaleve, me lëndën e parë hekurin dhe disa të tjera, me lëndën e parë aluminin, bakrin dhe metale të tjera, por edhe në investimin në centrale dhe projektimin e centraleve të energjisë elektrike.

Nga bilancet e depozituara pranë QKB, duket sikur këto kompani që zotërohen nga shtetasi Elman Abule, qarkullojnë dhe xhirojnë paratë e njëra-tjetrës, por nuk rezultojnë me fitim. Shumica e tyre rezultojnë me humbje.

Ajo që lidh fijet e shtetasit Elman Abule me kryetarin e Bashkisë së Tiranës, është kompania 'Fidalba', e themeluar që në vitin 2011, por për katër vite rresht nuk ka pasur asnjë aktivitet në shitje të materialeve dhe rezulton që në 10 janar 2024, kjo kompani, në pronësi të shtetasit Elman Abule, është subjekti ndërtues për një pallat 7-katësh në zonën e Kombinatit, ku ka pasur edhe një protestë lidhur me këtë pallat, nga banorët e Kombinatit dhe Lëvizja Bashkë, duke qenë se ishte lulishte.

Veliaj ka dhënë lejen e ndërtimit. Ajo që e bën pak të dyshimtë çështjen është se duke qenë se disa pallate gjatë kohës së rindërtimit në Kombinat u prishën, kërkuan të jepej leje në lulishten për të cilën Veliaj ka refuzuar që të japë lejen për shkak të statusit të tokës që ka qenë lulishte. Më pas, në momentin që kompania e mikut të tij, Elman Abule, është ndërtuese në të njëjtën parcelë, ka dhënë miratimin e lejes.

Kur banorët e Kombinatit që iu prishën shtëpitë kërkuan të ndërtohej pallati në afërsi të të njëjtit vend ku e kanë pasur shtëpinë, zoti Veliaj u tha, jo, këtu nuk lejohet, do të shkoni në Sharrë, ku kanë dërguar një pjesë të banorëve të Kombinatit. Na rezulton se ndërtues është subjekti që zotërohet nga miku i zotit Veliaj, leja është dhënë.

Zonja Lala përmendi se është ushtruar kontroll edhe pranë Adela Kondakçit. Rezulton se kompania e Adela Kondakçit quhet 'EGM' dhe është themeluar në vitin 2021. Nuk rezulton të ketë fitime dhe xhiro të shumta. Xhiroja mesatare kap shifrën e 120 mijë eurove në vit. Ka fokus aktivitetin e marketingut, publicitetit dhe shërbimeve financiare.

Dyshimet e SPAK-ut janë për përdorim të faturave fiktive. Kur ka para kesh, duhet t'i depozitosh në bankë dhe t'i justifikosh, të kesh barrën e provës se nga të kanë ardhur këto para. Ndaj kompani të lidhura me zonjën Ajola Xoxa, në fakt janë OJQ, arrijnë t'u kërkojnë miqve të tyre, të presin faturë shërbimi për të justifikuar qarkullimin e keshit, por në fakt, ai shërbim as nuk jepet dhe as nuk merret, por vetëm mundësohet qarkullimi i parave.

Driand Zeneli mund të lidhet me inceneratorët, sepse është artist dhe kurator, i cili ka qenë i akuzuar nga një gazetar holandez, Vincent van Gerven Oei, që ka shkruar një artikull investigativ, i cili tregon lidhjet se si kompania 'Integrated Energy' ka financuar ndërtimin e një vepre arti në landfillin e Sharrës dhe për këtë ka paguar kompania”, tha Xama./ CNA