Mesha e të Dielës së Tretë të Kreshmës së Madhe/ Besimtarët: Pasues i denjë i Fortlumturisë Anastas

23 Mars 2025, 11:40, Aktualitet CNA

Mesha e të Dielës së Tretë të Kreshmës së

Kryepiskopi i Tiranës, Durrësit dhe gjithë Shqipërisë, Fortlumturia e tij, Imzot Joani ka mbajtur sot meshën në Të Dielën e Tretë të Kreshmës së Madhe, të Faljes së Kryqit të Nderuar. Mijëra besimtarë janë mbledhur në Katedralen "Ngjallja e Krishtit" në qytetin e Korçës ku kanë pritur me shumë emocione Kryepiskopin, i cili i shërbeu Mitropolisë së këtij qyteti për 27 vite me shumë përkushtim.

Besimtarët ortodoksë mes emocionesh të mëdha e kanë mirëpritur Kryepiskopin me një lumturi e dashuri të madhe duke mos kursyer as fjalët më të mira për të. Besimtarët e konsiderojnë Fortlumturinë e tij, Imzot Joanin, si njeriun e zgjuar, të dashur, të kujdesshëm, të gjendur në çdo moment për ta me këshilla të vyera. Disa prej tyre e kanë njohur që prej ditës së parë kur Imzot Joani mori drejtimin e Mitropolisë së Shenjtë në Korçë, ndërsa kanë treguar se kanë patur një bashkëpunim të shkëlqyer përgjatë 27 viteve.

"Është një nga figurat më të ndritura që ka nxjerrë ortodoksia. Është pasues i denjë i fortlumturisë Anastas që e ndrittë perëndia aty ku e ka marrë. Është kryepiskopi i Korçës dhe sot është në nderin e tij që bën meshën e parë si Fortlumturia e Shqipërisë. E njoh që ditën e parë që ka ardhur këtu, si peshkop i Korçës. Ndihem i emocionuar dhe tejet i kënaqur, jam dhe pjesëtar i korit të Katedrales kështu që kemi patur një bashkëpunim me të shumë të ngrohtë e shumë të afërt."

"Unë jam e lumtur që po vij se dëgjova që është kryepiskopi. E kam dashur shumë. Jam besimtare e rregullt, gjithë të mirat ja uroj. Që kur erdhi ai këtu, unë kam qenë këtu dhe kam qenë edhe kur mori kurorën e Dhespotit në Tiranë, kemi shkuar me autobusa. E kam shoqëruar, kam ardhur gjithmonë, i kam puthur dorën gjithë ato herë. I uroj suksese dhe u shenjtëroftë gjithmonë."

"Jam shumë i lumtur që Dhespoti i Korçës i është dhënë mundësia që të bëhet Kryepiskop i Shqipërisë. Është njeriu më i denjë që mund të na ofrojë shërbimet më të mira për gjithë shqiptarët. Unë e njoh si një njeri shumë të zgjuar, shumë të urtë, një njeri që jep shumë këshilla të vyera për njerëzit. Jam shumë i lumtur që e kam sot këtu."

"Është njeriu më i mirë, më zemërmirë, më shpirtëror dhe më i drejtë. Ai na ka mësuar shumë gjëra për kishën, për njerëzimin, për besimin ndaj Zotit, të falim, të kemi miqësi nga të gjitha anët. Jam shumë e lumtur që ka ardhur. Unë kam punuar edhe në kishë dhe atje jam njohur shumë me Imzot Joanin."

Besimtarët kanë qëndruar për rreth 4 orë në Katedralen e Korçës për të marrë pjesë në Liturgjinë Hyjnore që nisi në orën 09:00 të mëngjesit të sotëm. Ky është një meshim historik me pjesëmarrjen e hierarkisë së Kishës Ortodokse, ku Imzot Joan Pelushi përshëndeti grigjën e Mitropolisë së Shenjtë së Korçës./ CNA