web counter
LEXO PA REKLAMA!

SHKARKO APP

App Store
Google Play

"Me snajper brenda në burg"/ Hoxhaj rrëfen planet e bëra me Nuredin Dumanin për eleminimin e Altin Ndocit

12 Shkurt 2026, 20:30, Aktualitet CNA

"Me snajper brenda në burg"/ Hoxhaj rrëfen planet e

Në Gjykatën e Posaçme është zhvilluar seanca e radhës për dosjen “Plumbi i Artë”. I penduari i drejtësisë, Henrik Hoxhaj ka vijuar me dëshminë e tij, ku sot ka rrëfyer planet e bëra me Nuredin Dumanin për vrasjen e Altin Ndocit.

Ai është shprehur se dhe pse Ndoci u arrestua, planet për vrasjen e tij nuk u anuluan. Ai tha se bashkë me Dumanin kanë menduar ta vrasin Ndocin me snajper brenda në burg.

“Kam marrë porosi për vrasjen e Altin Ndocit. Kjo për shkak se këta ishin bërë bashkë dhe ishin bërë kundra Krymit. U mor porosia po nuk u bë, se ishte Covidi. Ndoci ka jetuar nga zona e “Misto Mames”. I kam kaluar në lagje, ma ka treguar Nuredini. Bije shumë në sy se ishte pandemi, nuk kishte ku rrije. Sipas Nuredinit, Krymi e kishte porositur. Ai investonte. Pastaj Ndoci ra në burg. Po pasi ishte ne burg, a vijoi ndonjë plan Nuredini për vrasjen e tij? Ne jemi interesuar për ta vrarë Altin Ndocin me snajper brenda në burg. Nuredini e diskutonte me mua. Ishte në ëndrrat e tij, por nuk e kemi realizuar”, është shprehur Hoxhaj.

Kujtojmë se Altin Ndoci u arratis në 13 janar nga spitali infektiv i Durrësit. Ai arriti t’ia mbathte nga efektivët të cilët e kishin shoqëruar. Pas arratisjes së tij u pezullua nga detyra zinxhiri komandues i burgut të Durrësit.

Ndoci akuzohet për veprat penale “Vrasja në rrethana te tjera cilësuese”, ndaj dy ose më shumë personave, e kryer më shumë se një herë, “Mbajtja pa leje dhe prodhimi i armëve, armëve shpërthyese dhe i municionit”, të kryera në bashkëpunim të veçantë atë të grupit të strukturuar kriminal, dhe “Grupi i strukturuar kriminal”, (në rolin e pjesëmarrësit) dhe “Kryerja e veprave penale nga grupi i strukturuar kriminal”. /CNA





Lajmet e fundit nga