Me këmbët zbathur/ Momenti i përballjes së Marklen Hakës me Tonin Vocajn në Drejtorinë e Tiranës

7 Shtator 2024, 12:36, Aktualitet CNA

Me këmbët zbathur/ Momenti i përballjes së Marklen

Marklen Haka, anëtari i ‘Bandës së Niklës’, i cili arrestua të enjten gjatë një aksioni në Nikël të Fushë-Krujës, pas arrestimit u dërgua në Drejtorinë e Policisë Tiranës.

Këmbëzbathur dhe nën pranga, në këtë institucion, ai është përballur dje me kryepolicin Tonin Vocaj, që po dilte nga ndërtesa.

Në pamjet e publikuara, ai duket se është duke i thënë diçka Vocajt, por nuk kuptohet se çfarë i ka komunikuar. Vocaj ka tundur kokën dhe më pas ka takuar efektivë të tjerë, ndërsa “i forti i Niklës” është shoqëruar brenda në drejtori.

Marklen Haka nuk është një emër i panjohur për Policinë e Shtetit. Në skedarët e policisë 33-vjeçari rezulton i arrestuar disa herë për vepra të ndryshme penale, ndërkohë që ka qenë objektiv i dy sulmeve me armë.

Mbi të rëndojnë veprat penale "Vrasja me paramendim", "Grup i strukturuar kriminal", dhe "Kryerja e veprave penale nga grupi i strukturuar kriminal dhe organizata kriminale", "Sigurimi i kushteve dhe mjeteve materiale për të kryer vrasje", "Grup i strukturuar kriminal", dhe "Pjesmarrje në grup të strukturuar kriminal", "Mbajtja pa leje dhe prodhimi i armëve, armëve shpërthyese dhe i municionit", në bashkëpunim, në formën e grupit të strukturuar kriminal.

Haka i ka shpëtuar edhe një atentati në vitin 2019, ku mbeti e vrarë halla e tij, 50-vjeçarja Shpresa Basha, e cila mbrojti nipin me trupin e saj.

Marklen Haka ka përfunduar për herë të parë në pranga kur ishte 20 vjeç, i dyshuar për një vepër të rëndë penale, atë të vrasjes.

Ai u arrestua më 29 qershor të vitit 2011, i dyshuar nga Prokuroria e Tiranës si autori i vrasjes së biznesmenit N.Z, mbrëmjen e 13 qershorit të po atij viti, në një nga baret tek ish-Blloku në kryeqytet.

Më 12 shtator të vitit 2018, Marklen Haka u arrestua bashkë me të atin e dy persona të tjerë, në operacion e bujshëm, gjatë të cilit forcat speciale rrethuan Niklën dhe disa fshatra të tjera të Krujës, duke shoqëruar dhjetëra persona, por që arriti të gjente vetëm disa armë pa leje. Në lidhje me këtë arrestim, Haka u dënua me 1 vit heqje lirie.

Me një vendim të datës 9 prill 2019, Gjykata e Krujës e dënoi Hakën me 1 vit e gjysmë burg, por me gjykim të shkurtuar ai u dënua përfundimisht me 1 vit heqje lirie. Dënim që e përfundoi në korrik të 2019./CNA