Mashtronin se jepnin makina me qira/ Prokuroria e Shkodrës dërgon për gjykim 4 persona

16 Dhjetor 2025, 14:26, Aktualitet CNA

Mashtronin se jepnin makina me qira/ Prokuroria e Shkodrës dërgon

Prokuroria e Shkodrës ka dërguar për gjykim katër persona të akuzuar për veprat penale “Mashtrim” dhe “Falsifikim”. Sipas njoftimit të Prokurorisë, dy shtetasit A.K dhe O.K., të cilët në bashkëpunim me njëri-tjetrin, kanë hapur një faqe interneti “Autorental Tirana”, ku kanë reklamuar automjete të ndryshme për dhënie me qira.

Pasi interesat e klientëve konkretizoheshin, ata kontaktoheshin përmes një numri telefoni të regjistruar në emër të një personi të tretë. Pagesat kryheshin, por automjetet nuk dërgoheshin kurrë në destinacionet e kërkuara.

Nga dosja hetimore rezulton se M.P., punonjëse pranë subjektit “F.K” PF, ka vënë në dispozicion numrin e telefonit të përdorur në mashtrim, duke e regjistruar në emër të një personi tjetër, i cili nuk kishte dijeni për ekzistencën apo përdorimin e tij.

Pas përfundimit të hetimeve dhe mbledhjes së provave, Prokuroria e Shkodrës ka dërguar çështjen për gjykim në Gjykatën e Shkodrës, ku pritet të shqyrtohet përgjegjësia penale e të gjithë të pandehurve.

Njoftimi i Prokurorisë:

Reklamuan se jepnin automjete me qera, duke përfituar para dhe mos kryer shërbimin, Prokuroria Shkodër dërgon në gjyq 4 persona për ‘Mashtrim’ e ‘Falsifikim’

Prokuroria pranë Gjykatës së Shkallës së Parë e Juridiksionit të Përgjithshëm, Shkodër, përfundoi hetimet dhe dërgon në gjyq shtetasit A.K., O.K. për veprën penale ‘Mashtrimi’ i kryer në bashkëpunim më shumë se një herë, parashikuar nga neni 143, paragrafi i dytë i Kodit Penal, shtetasen M.P. për veprën penale “Falsifikimi i vulave, i stampave ose i formularëve”, parashikuar nga neni 190, paragrafi i tretë i Kodit Penal dhe shtetasin A.K. për veprën penale “Falsifikimi i vulave, i stampave ose i formularëve”, të kryer më shumë se një herë, parashikuar nga neni 190, paragrafi i dytë i Kodit Penal.

Nga veprimet hetimore të kryera në kuadër të procedimit penal nr.71, të vitit 2024, rezultoi se, se të pandehurit A.K dhe O.K, në bashkëpunim me njëri-tjetrin kanë hapur fiktivisht një faqe interneti “Autorental Tirana”, ku kanë reklamuar automjete të ndryshme për dhënie me qera.

Për të kontaktuar me personat të cilët shfaqnin interes për marrjen e këtyre automjeteve me qera ata kanë përdorur një numër telefoni të regjistruar në emër të një personi të tretë dhe pasi kanë marrë pagesat nga personat që kanë rezervuar automjetet, të pandehurit nuk ju kanë dërguar në destinacionin e kërkuar automjetet.

Ndërsa e pandehura M.P, duke qenë punonjëse pranë subjektit “F.K” PF, ka dhënë numrin celular që kanë përdorur të pandehurit, duke e regjistruar në emër të një personi të tretë, i cili nuk kishte dijeni mbi këtë numër celulari.

I pandehuri A.K., është administrator i subjektit “ERGI-2012”, me objekt aktiviteti ndër të tjera “Transferta parash”, ka nënshkruar në formularët e tërheqjes së shumave të parave, në rekuizitën e “marrësi”, në emër të shtetasit A.K., të shumave të parave që persona të ndryshëm kanë dërguar tek shtetasi A.K, për marrjen e mjeteve me qira.

Në lidhje me këtë ngjarje pasi janë kryer veprimet hetimore dhe procedurale, për zbardhjen e plotë të rrethanave dhe motivin dhe çështja penale në ngarkim të këtyre shtetasve është dërguar në Gjykatën e Shkallës Parë të Juridiksionit të Përgjithshëm Shkodër. /CNA