web counter
LEXO PA REKLAMA!

SHKARKO APP

App Store
Google Play

Manastirliu, në shkollën “7 Marsi”: Zgjerojmë rrjetin e laboratorëve smart në shkolla në të gjithë vendin

4 Qershor 2025, 13:12, Aktualitet CNA

Manastirliu, në shkollën “7 Marsi”: Zgjerojmë rrjetin

Ministrja e Arsimit dhe Sportit, Ogerta Manastirliu, zhvilloi sot një vizitë në shkollën “7 Marsi” në Tiranë, ku ndoqi nga afër një orë mësimi të gjuhës angleze të zhvilluar në laboratorin e ri inteligjent të kësaj shkolle.

Laboratori inteligjent është kthyer në një hapësirë të re të të mësuarit, ku teknologjia vihet në shërbim të të gjitha lëndëve, duke e bërë procesin mësimor më tërheqës dhe efikas për nxënësit.

“Ky laborator në shkollën ‘7 Marsi’ është shumëfunksional, jo vetëm për të mësuar lëndën e teknologjisë dhe informacionit, por gjithashtu edhe për të mësuar lëndë të tjera, për t’u aftësuar më shumë përmes platformave interaktive dhe përmes të gjithë atyre projekteve të bukura që nxënësit kanë zhvilluar së bashku me mësuesen,” u shpreh ministrja Manastirliu.

Gjatë vizitës, ministrja tha se rrjeti i laboratorëve inteligjentë do të shtrihet më gjerë në të gjithë vendin, si pjesë e një plani të qartë për digjitalizimin e shkollave dhe fuqizimin e metodave bashkëkohore të mësimdhënies.

“Jemi duke punuar të zgjerojmë rrjetet e laboratorëve në shkolla. Do ta shtrijmë edhe në 654 shkolla të tjera,” deklaroi ministrja Manastirliu duke vënë theksin te vijimi i investimeve për transformimin e shkollave në hapësira moderne, të pajisura me teknologji, për të siguruar që çdo fëmijë në Shqipëri të ketë mundësi të barabarta për të mësuar dhe për të ndjekur ritmin e kohës./ CNA





Lajmet e fundit nga