Liturgjia Hyjnore/ Mesazhi i Fortlumturisë së Tij, Joan: Një zemër e pastër kërkon të mirën te të gjithë njerëzit

21 Qershor 2026, 10:34, Aktualitet CNA

Kryepiskopi i Tiranës, Durrësit dhe gjithë Shqipërisë ka drejtuar sot Mëngjesoren dhe Liturgjinë Hyjnore në Katedralen “Ngjallja e Krishtit”.

Fortlumturia e Tij gjatë predikimit theksoi rëndësinë e mesazheve të Ungjillit të sotëm në jetën e njeriut.

Kryepiskopi Joan u shpreh se nëse një person e ka mendjen dhe zemrën e pastër sheh më të mirën tek njerëzit, e nëse një njeri ka zemrën e keqe shikon të keqen kudo.

Ndër të tjera, Fortlumturia e Tij thekson se njeriu duhet t’i shërbejë Zotit me gjithë fuqinë, mendjen dhe shpirtin e tij.

“Ungjilli i sotëm ndoshta është më i rëndësishmi ndoshta për secilin nga ne që është në kishë. Së pari na thotë që kandili i trupit është syri. Nëse syri është i pastër gjithçka është i pastër. E nëse syri nuk është i pastër gjithçka kthehet në errësirë. Zoti nuk e ka fjalën thjesht për syrin fizik por e ka për syrin shpirtëror, pastërtinë e mendjes dhe zemrës. Nëse nuk e kemi mendjen e pastër edhe njerëzit e tjerë nuk i shohim mirë sepse jemi në errësirë.

Shpeshherë në projektojmë tek të tjerët ato gjëra që i kemi vetë. Një njeri që është i mirë mundohet të shohë mirësinë kudo. Një njeri që ka zemrën e keqe shikon të keqen kudo. Prandaj në këtë detyrë duhet pastruar zemra. Duke pasur zemrën e pastër do kërkosh të mirën tek të gjithë njerëzit e tjerë. Sot na thotë dhe një fjalë të rëndësishme. Nuk mund t’ju shërbejmë dy zotërinjve edhe Zotit edhe botës.

Nëse marrim pjesë e përgatitemi për ti shërbyer Zotit duhet të heqim dorë nga gjërat e botës, pasuritë, pushtetet, lavditë e kota e gjithçka tjetër që sundon botën e sotme. Nëse një sy sheh majtas, tjetri djathtas ai njeri nuk sheh fare. E njëjta gjë ndodh me jetën shpirtërore. Përpiqu t'i shërbesh Zotit me gjithë fuqinë, mendjen dhe shpirtin tënd. Nëse do bëhen këto gjëra Zoti do të shpërblejë”, u shpreh Fortlumturia e Tij, Kryepiskopi Joan. /CNA