Leka Bungo sulmon Aurora Polon: Hiq dorë nga kandidimi për drejtoreshë të RTSH-së

10 Shkurt 2025, 12:22, Aktualitet CNA

Leka Bungo sulmon Aurora Polon: Hiq dorë nga kandidimi për

Kryetari i Këshillit Drejtues të Radio Televizionit Shqiptar, Leka Bungo, ka sulmuar drejtoreshën e komanduar të Radio Televizionit Publik Shqiptar.

Përmes një letre, Bungo i kërkon Aurora Polos të heqë dorë nga kandidimi për drejtor të RTSH-së.

Sipas tij, Polo është në shkelje të statutit të RTSH-së.

Në fakt i kujtojmë z. Leka Bungo se në shkelje të ligjit dhe statutit është vetë kreu i Këshillit Drejtues të RTSH-së pasi ka marrë para nga fondet e RTSH-së, ka shkelur ligjin dhe statutin e RTSH-së, ka gënjyer në Kuvend si dhe ka falsifikuar firmën në mbledhje të Këshillit Drejtues.

Letra e plotë e Leka Bungo për Aurora Polon:

Zonja Polo,

Statuti i RTSH-së, ndër të tjera, në Nenin 10, Pika 1, Germa C, saktëson:

“Drejtori i Përgjithshëm i RTSH-së… duhet të ketë përvojë pune jo më pak se dhjetë vjet, nga të cilat pesë vjet në pozicione menaxhimi NË MEDIA, institucione publike (jo administrative), në sektorin privat, në shkenca komunikimi, teknologji komunikimi dhe dixhitale.”

I njëjti kriter është i detyrueshëm edhe për emërimin e Zv. Drejtorit të Përgjithshëm.

Megjithatë, ish-Drejtori i Përgjithshëm, në shkelje të Statutit, ju ka emëruar Zv. Drejtore, dhe ju keni kryer funksionet e saj për disa muaj, edhe pse Këshilli Drejtues, nomenklaturë e të cilit jeni pjesë, ka REFUZUAR emërimin tuaj.

Befas, në një nga mbledhjet e Këshillit Drejtues, ju u emëruat me shumicë votash në pozicionin e Zv. Drejtorit të Përgjithshëm.

Padyshim, emërimi juaj ishte i ligjshëm, pasi vendimi u mor me shumicë votash. Megjithatë, sipas gjykimit tonë, ai ishte i paligjshëm për anëtarët e Këshillit Drejtues.

Gjithsesi, në një rast të tillë, ju nuk mund t’i shmangeni përgjegjësisë morale, pasi ishit e vetëdijshme që emërimi ishte në kundërshtim me Statutin e RTSH-së.

2. Kandidatura juaj për Drejtor të Përgjithshëm

Zonja Zv. Drejtore, pas dorëheqjes së Drejtorit të Përgjithshëm, ju keni aplikuar për postin e Drejtorit të Përgjithshëm.

E keni bërë këtë edhe pse jeni e vetëdijshme se, ashtu si në rastin e emërimit tuaj të parë, edhe për postin e Drejtorit të Përgjithshëm ekziston e njëjta pengesë ligjore:

Kriteri i përcaktuar në Statut – Neni 10, Pika 1, Germa C.

Këmbëngulja dhe etja e domosdoshme për t’u ulur në karrigen e Drejtorit të Përgjithshëm ju ka “errësuar vështrimin”, saqë nuk ju lejon të lexoni as Statutin.

Këmbëngulja juaj e pashpjegueshme ka zvarritur procesin zgjedhor për zgjedhjen e Drejtorit të ri të institucionit.

Nëse mendoni se mund ta realizoni pikësynimin tuaj ashtu si atëherë kur u ulët në karrigen e Zv. Drejtorit, gjykoj se gaboheni.

Duke u nisur nga sa më sipër, do t’ju këshilloja të jepni dorëheqjen nga gara për emërimin në postin e Drejtorit të Përgjithshëm të RTSH-së.

Me respekt,

Leka Bungo

Kryetar i Këshillit Drejtues

Radio Televizioni Shqiptar (RTSH)