Lajthitjet e Veliajt/ Pranon shkarkimin në Gjykatën e Lartë, nuk e njeh në Gjykatën Kushtetuese

2 Tetor 2025, 14:18, Aktualitet CNA

Lajthitjet e Veliajt/ Pranon shkarkimin në Gjykatën e Lartë, nuk

Kryebashkiaku i shkarkuar i Tiranës, Erion Veliaj, vazhdon me lajthitjet e tij ligjore në mënyrë të pandalshme.

Sa më shumë ditë kalojnë, sa më shumë zgjat procesi, aq më shumë budallallëqe dhe çmenduri, gjëra të pabesueshme, shohim ditë pas dite.

Çfarë ndodh në fakt?

Erion Veliaj sot ka pasur gjyqin në Gjykatën e Lartë, pasi ka bërë për herë të dytë ankimim duke kërkuar t’i ndryshohet masa e sigurisë.

Gjykata e Lartë ka rrëzuar kërkesën e Veliajt, duke e lënë në qeli ish-kryebashkiakun e Tiranës.

Ekskluzive/ Gjykata e Lartë lë në burg Erion Veliajn
2 Tetor, 13:01

Në rekursin e bërë nga avokatët para disa ditësh, Veliaj, sipas vetë mbrojtësve ligjorë të tij, ka theksuar se duhet të lirohet për shkak se ai tashmë nuk i prish dot më provat dhe se në kushtet dhe rrethanat e reja pasi është shkarkuar nga Këshilli i Ministrave duhet t’i zbutet masa e sigurisë, në arrest shtëpie ose në gjendje të lirë. Kjo kërkesë e vendosur në rekursin e bërë në Gjykatën e Lartë tregon se Erion Veliaj e ka pranuar shkarkimin.

Pra, shkon në Gjykatën e Lartë me rrethana të tjera, me fakte dhe prova të tjera, duke thënë se 'unë jam shkarkuar, nuk jam më kryetar bashkie dhe tani mund të ndiqem i lirë'.

Por, në fakt, Erion Veliaj, nga ana tjetër, nuk e ka njohur shkarkimin.

Megjithëse ai në Gjykatën e Lartë thotë unë jam i shkarkuar, ai ka shkuar në Gjykatën Kushtetuese, ku ka ankimuar vendimin e Këshillit të Ministrave dhe ka kërkuar që ai vendim të anulohet pasi Këshilli i Ministrave nuk e shkarkon dot, sepse procedura e ndjekur nga Këshilli Bashkiak është e paligjshme, pasi ai nuk ka munguar tre muaj në punë, por kanë qenë rrethanat dhe arsyeja se ai është në burg dhe nuk ka mundur të paraqitet në detyrë.

Erion Veliaj çon në Gjykatën Kushtetuese shkarkimin e tij
29 Shtator, 08:55

Pra, nga njëra anë Erion Veliaj shkon në Gjykatën e Lartë duke thënë se unë jam shkarkuar, nga ana tjetër ankimon vendimin e Këshillit të Ministrave për shkarkimin e tij në Gjykatën Kushtetuese.

Me sa “Erionë” kemi të bëjmë?!

Kemi një Erion që thotë 'më lironi se u shkarkova' dhe një tjetër që thotë 'nuk e njoh shkarkimin, dua të jem akoma kryetar bashkie'./ CNA