KLP nuk pranon kërkesën e ILD-së për masë disiplinore ndaj magjistrates A.K.

2 Tetor 2025, 13:29, Aktualitet CNA

KLP nuk pranon kërkesën e ILD-së për masë disiplinore

Këshilli i Lartë i Prokurorisë rrëzoi në mbledhjen e sotme propozimin e Inspektorit të Lartë të Drejtësisë për caktimin e masës disiplinore “Vërejtje publike” ndaj prokurores A.K., e Prokurorisë pranë Gjykatës së Shkallës së Parë të Juridiksionit të Përgjithshëm Korçë, për shkelje të dispozitave, që rregullojnë organizimin dhe funksionimin e gjykatave/prokurorisë dhe shkelje të rregullave të konfidencialitetit dhe të mospërhapjes së informacionit, që rezulton nga hetimi ose gjykimi në proces ose i përfunduar.

Nga raporti hetimor i ILD-së rezultoi se magjistratja A.K. ka nënshkruar shkresa pa pasur kompetencë, nxjerrë dhe dërguar të tretëve kopje të disa akteve, pjesë të dosjes së një çështjeje në proces hetimi, duke shpërfillur autoritetin e titullarit të prokurorisë, cenuar imazhin e zyrës së prokurorisë, teksa publikimi i akteve procedurale mbart rrezikun e ardhjes së pasojave në dëm të hetimit dhe për rrjedhojë humbjen e besimit të publikut për funksionimin e Prokurorisë sipas ligjit dhe jo dëshirës së magjistratit.

Në raportin hetimor të ILD-së, evidentohet se ligji nr. 97/2016 “Për organizimin dhe funksionimin e prokurorisë parashikon mes të tjerash se:

1- Prokurorët dhe gjithë personeli i prokurorisë, gjatë ushtrimit të detyrës së tyre, si edhe pas përfundimit të saj, janë të detyruar të ruajnë konfidencialitetin dhe sekretin shtetëror për fakte për të cilat vijnë në dijeni, me përjashtim të rasteve kur ligji parashikon ndryshe.

2- Prokurorisë nuk i lejohet të bëjë publike ose t’u japë personave të tretë të dhëna që dëmtojnë çështjen në proces hetimi apo gjykimi, që cenojnë dinjitetin dhe jetën private të personave, të drejtat e të miturve, si dhe të dhëna me karakter konfidencial ose të rezervuar.

3 – Prokurorëve u ndalohet të bëjnë deklarata ose të japin mendime për veprimtarinë e organeve të tjera.

Duke mbajtur në konsideratë natyrën e shkeljes disiplinore, ekzistencën e rrethanës lehtësuese, lidhur me shkeljen për herë të parë, përvojën 2 vjeçare në funksionin e prokurores, cënimin e imazhit të prokurorisë dhe besimit të publikut në sistemin e drejtësisë, ILD konkludoi se veprimet/mosveprimet e ndërmarra nga ana e magjistrates përbëjnë “Shkelje disiplinore e lehtë”, sipas nenit 102 pika 1 shkronjat “g” dhe “j” të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, të ndryshuar dhe i propozoi KLP-së caktimin e masës disiplinore “Vërejtje publike” ndaj znj. A.K., kërkesë që u rrëzua nga Këshilli i Lartë i Prokurorisë./ CNA