web counter
LEXO PA REKLAMA!

SHKARKO APP

App Store
Google Play

E fundit!

x

Koncesionet/ GJKKO kërkon që Beqaj, Rrjepaj dhe Rrapaj të akuzohen si grup i strukturuar kriminal

23 Dhjetor 2024, 14:52, Aktualitet CNA

Koncesionet/ GJKKO kërkon që Beqaj, Rrjepaj dhe Rrapaj të

Gjykata e Posaçme ka kërkuar që të rikualifikohet akuza për Ilir Beqajn, Klodjan Rjepajn dhe Ilir Rrapajn në lidhje me dosjen e “Sterilizimit”.

Trupa gjykuese ka kërkuar që Beqaj, Rrjepaj dhe Rrapaj të akuzohen për “vjedhje duke shpërdoruar detyrën” dhe “grup i strukturuar kriminal”.

Më herët, SPAK ngriti akuzën penale të “shpërdorimit të detyrës” për ish-ministrin Beqaj lidhur me procedurat e dhënies së koncesionit me vlerë 100 milionë euro, në vitin 2015.

Ndërsa për Rrapajn dhe Rrjepajn ngriti akuzën e “falsifikimit të dokumenteve”, “mashtrimit” dhe “shpërdorimit të detyrës”.

Prokuroria ka thënë në seancën e kësaj të hëne se pranon të ngrejë akuzat ashtu siç i sugjeron gjykata, pavarësisht se mendon se akuzat e ngritura prej SPAK-ut ishin të drejta.

Në 30 mars, SPAK mbylli hetimet për dosjen e koncesionit të “Sterilizimit” dhe dërgoi në gjykatë dosjen ndaj 9 personave të vënë nën akuzë, mes tyre dhe ish-ministri i Shëndetësisë, Ilir Beqaj.

Nga hetimet ka rezultuar se ish-ministri nuk ka evituar konfliktin e interesit me biznesmenin Ilir Rrapaj, fituesin e koncesionit me vlerë 100 milionë euro dhe nuk ka kërkuar studim të detajuar për nevojat e sterilizimit në mënyrë që të zgjidhte një variant më pak të kushtueshëm.

Në këto kushte, SPAK ka vënë në akuzë edhe Ilir Rrapajn në cilësinë e aksionerit të kompanisë dhe ish-zëvendësministrin e Shëndetësisë në atë kohë, Klodian Rjepaj, të cilët prej gushtit 2023 ndodhen në burg./ CNA





Lajmet e fundit nga