LEXO PA REKLAMA!

SHKARKO APP

E fundit!

x

Kë të besojmë, kryeministrin apo prokurorinë?

20 Shtator 2022, 16:33, Aktualitet CNA
Kë të besojmë, kryeministrin apo prokurorinë?
Kryeministri Edi Rama

Sot pasdite prokuroria ka nxjerrë një njoftim të dytë në lidhje me sulmin kibernetik nga hakera iraniane.

Dje ka njoftuar publikisht se mediat nuk duhet të publikojnë dhe transmetojnë materialet e nxjerra nga hakerat nga e-maili i ish-drejtorit të policisë së shtetit, se janë objekt hetimi dhe çështje, të cilat prekin sigurinë kombëtare dhe të dhëna individuale.

Në fakt, as dje dhe as sot, asnjë nga mediat nuk duket të ketë publikuar ndonjë të dhënë personale apo konfidenciale që cenojnë sigurinë kombëtare, por gjithsesi prokuroria ka mbajtur një qëndrim.

Mediat padyshim që duhet të jenë më të kujdesshme në raportimet që bëjnë, por kë duhet të besojmë, prokurorinë që thotë ka të dhëna sensitive të sigurisë kombëtare, apo kryeministrin.

Në një deklaratë të datës 18 korrik 2022, kryeministri ka thënë që ka qenë një sulm frontal, por të dhënat janë të sigurta e nuk është cenuar asnjë e dhënë e sigurisë kombëtare.

“Sistemet qeveritare kanë të gjitha 'back-up' dhe janë të sigurta. Në këtë moment jemi duke verifikuar sistem pas sistemi që këto të fundit të jenë të sigurta në çdo element, përpara se të kthehen sërish online dhe në funksionalitet të plotë.

Paralelisht, të gjithë aktorët institucionalë janë në gatishmëri të plotë dhe në komunikim të vazhdueshëm për hetim të thellë e të detajuar të këtij krimi kibernetik. Sigurojmë të gjithë qytetarët se të dhënat e sistemeve të informacionit të shërbimeve qeveritare janë të sigurta dhe të paprekura.

Nuk ka vend për polemika politike aq kohë sa jemi përballë një armiku të përbashkët në këtë luftë kibernetike, ndaj të lëmë ekspertët të bëjnë punën e tyre në mënyrë që çdo sistem që rikthehet në punë të jetë funksional dhe mbi të gjitha i sigurtë”, deklaronte Rama asokohe.

Tani prokuroria thotë se këto të dhëna janë për sigurinë kombëtare, ndërsa kryeministri thotë nuk cënojnë sigurinë kombëtare.

Kë të dëgjojmë dhe besojmë, prokurorinë që thotë mos publikoni, apo kryeministrin që thotë nuk cenohet siguria kombëtare.

Për sa kohë që nuk cenohet siguria, përse nuk duhet të publikojnë mediat të dhëna të cilat janë jokonfidenciale, por të dhëna të cilat shkojnë në interest të publikut, siç janë ato që kanë të bëjnë me informacione në lidhje me trafikun e drogës, apo informacione të tjera që kanë pasur institucionet ligjzbatuese dhe nuk kanë vepruar vite më parë.

Gjithsesi, reagimi i prokurorisë në fakt është një akt më shumë parapengues, pasi qartazi duket që as prokuroria dhe as qeveria ndoshta nuk dinë fare se çfarë kanë marrë hakerat dhe çfarë kanë mundur të hakojnë në sistemet e shtetit shqiptar.

Dhe ndoshta me këto urdhra dhe vendime që nxjerrin, thjeshtë dhe vetëm duan të paralajmërojnë se më e keqja nuk ka ardhur akoma./ CNA.al

Lajmet e fundit nga