ISP sulmon KQZ-në, a është në konflikt interesi?

9 Qershor 2025, 09:22, Aktualitet CNA

Në një deklaratë të nxjerrë një ditë më parë, ISP, midis të tjerave, sulmoi edhe KQZ-në dhe organet e KQZ-së që ISP i quan organe drejtuese.

Pretendimet e ISP-së lidhen me ato që dikush në ISP i quan lexime të ndryshme të dispozitave të Kodit Zgjedhor.

Nuk kuptohet qartë se çfarë nënkupton doktrina “alla ISP” me leximin e ndryshëm te dispozitave të Kodit Zgjedhor.

KQZ ka 3 organe që ndjekin funksione të ndryshme.

Komisioneri Shtetëror i Zgjedhjeve ka funksione të plota si drejtues i administratës së KQZ-së dhe gjithashtu ka funksione vendimmarrëse në zbatim të Kodit Zgjedhor, si dhe propozon masat për shkeljet administrative në Komisionin e Shqyrtimit të Ankesave. Komisioneri zbaton rregullat e vendosura nga Komisioni Rregullator dhe propozon po aty ndryshimin ose përmirësimin e rregullave.

Nga ana tjetër ISP është organizatë e shoqërisë civile që ka të drejtën të denoncojë dhe kërkojë masa administrative ndaj subjekteve zgjedhore dhe jo vetëm. Kjo cilësi e bën ISP-në palë në proceset e shqyrtimit administrativ brenda KQZ-së.

Të ankohesh për organet që kanë shqyrtuar ankesat e tua është legjitime, por të hartosh raporte dhe deklarata për organet në të cilat ke qenë palë si ankues, është konflikt interesi.

Është njësoj sikur një avokat që përfaqëson një palë në gjykatë, të bëjë edhe raportet e vlerësimit të punës së Gjyqtarit. Ta bëjë këtë edhe në ato raste, por sidomos në ato raste kur gjyqtari ka nxjerrë vendimin kundër ankuesit.

Një palë në një shqyrtim administrativ ka gjithmonë të drejta procedurale të ankimimit. Por ankimimi nuk bëhet me raporte që përcillen në shtyp, por me ankimime gjyqësore.

ISP nuk i ka përcjellë asnjë ankimim Kolegjit Zgjedhor për vendime të KQZ-së.

Çfarë pretendon ISP me lexim të njëjtë të dispozitave?

Që të gjitha shkallët e shqyrtimit administrativ dhe gjyqësor të certifikojë çfarë ka shkruar personi që ankohet? Ky do të ishte lexim i unifikuar për ISP-në?

Pse ISP nuk është ankuar në Kolegjin Zgjedhor për t’i shërbyer kështu unifikimit të leximit të dispozitave, por bën deklarata në shërbim të delegjitimimit të organeve të KQZ-së?

Ky qëndrim i shoqëruar me ankimime të bëra me deklarata publike e vendos në pozita të dyshimta vullnetin e mirë të Organizatës që drejtohet nga Afrim Krasniqi, i cili përveç postit si drejtues pa rivalë në ISP, ushtron edhe funksione të tjera këshillimore me pagesë nga buxheti i shtetit.

Më poshtë një pjesë e deklaratës së shpërndarë nga ISP.

“ISP vlerëson se KQZ duhet të unifikojë qëndrimet dhe vendimet lidhur me raste të njëjta, praktika të njëjta, denoncime të njëjta dhe dispozita të njëjta të Kodit Zgjedhor. Janë zgjedhjet e treta që zhvillohen me këtë bazë ligjore dhe organet drejtuese të KQZ, bëjnë interpretime të ndryshme të dispozitave dhe fenomeneve të kundërligjshme të denoncuara.”/ CNA