Edicioni i XXI-të i Rally Albania/ Për 7 ditë adrenalinë, eventi më i madh i garave në Ballkan

8 Qershor 2025, 15:48, Aktualitet CNA

Edicioni i XXI-të i Rally Albania/ Për 7 ditë adrenalinë,

Ka startuar nga Shkodra edicioni i 21-të i Rally Albania, eventi më i madh i garave motorike në vend dhe një nga më të njohurit në Ballkan.

Për shtatë ditë me radhë, pilotë nga vende të ndryshme të botës do të përshkojnë terrenet më të vështira dhe panoramat më të bukura që ofron Shqipëria, në një sfidë që bashkon adrenalinën me aventurën.

Edicioni i XXI-të i Rally Albania/ Për 7 ditë adrenalinë,

Me dhjetëra automjete dhe motorë të specializuar për gara në terrene të thyer, Rally Albania këtë vit ka zgjedhur pikërisht Shkodrën si pikënisje simbolike të këtij udhëtimi sfidues, duke promovuar jo vetëm sportin ekstrem, por edhe turizmin në Shkodër. Pilotët u mirëpritën në këtë nisje të eventit nga nënkryetarja e Bashkisë Shkodër Teuta Qyteza, e cila vlerësoi këtë event, por edhe mikpritjen që ata gjejnë në Shkodër.

“Mirësevini në Shkodër, jemi përpara bashkisë në emër të së cilës iu përshëndes e iu uroj një garë me adrenalinë të fortë, që t’i kujtoni gjatë këto emocione. E kudo që të shkoni t’i merrni me vetë e ta kujtoni Shkodrën. Gjatë ecjes suaj, pamjet tona të natyrës, kulinarinë e përzgjedhur me dëshirën që të jeni edhe ju promotorë të turizmit tonë. Kudo që shkoni, do të kujtoni pamjet tona dhe Shqipërinë e mrekullueshme. Uroj që çdo gjë të shkojë mbarë e mirë dhe kudo të tregoni për Shqipërinë tonë. Vende të mira që kemi për turizmin veror, malor, ku ju do të shkelni me mjetet tuja. Ky është Edicioni i XXI-të e unë uroj të mos ndalet kurrë”,-tha Qyteza.

Pjesëmarrësit do të kalojnë nëpër qytete, male dhe zona të thella të vendit, përpara se të përmbyllin garën në Tiranë. Organizatorët theksojnë se ky edicion do të ketë më shumë etapa, më shumë kilometra dhe një rritje të konsiderueshme të pjesëmarrësve nga jashtë.

Edicioni i XXI-të i Rally Albania/ Për 7 ditë adrenalinë,

“Mirësevini në Shqipëri e në veçanti në Shkodër, jemi tek ai vendi që e duam shumë. Jemi një javë me aventurë me Rally Albania. Edicioni i XXI-të. Ju përshëndes ju që jeni për të disatën herë, por edhe ju që jeni për herë të parë. Një përshëndetje të veçantë e kam për vajzat garuese që janë 3 në total. Duhet të themi që janë me motor dhe kjo është më aventurë. Dua t’iu uroj të gjithëvë suksese dhe të gëzojmë në 7 ditët e garës, ta mbyllim me sukses dhe pa probleme”,-tha Julia Dhame nga Rally Albania.

Rally Albania nuk është vetëm një garë, por një aktivitet që gjallëron jetën ekonomike dhe turistike të zonave ku kalon, duke promovuar Shqipërinë si destinacion për sportet motorike dhe atë të aventurës./CNA