web counter
LEXO PA REKLAMA!

SHKARKO APP

App Store
Google Play

Ish-drejtuesi i Policisë së Shtetit mbyll karrierën 44-vjeçare/ Prençi: Mbrojtës dinjitoz i kauzave të drejta

8 Gusht 2025, 15:11, Aktualitet CNA

Ish-drejtuesi i Policisë së Shtetit mbyll karrierën

Drejtuesi i Parë në Policinë e Shtetit, Besnik Bakiu ka mbyllur sot shërbimin aktiv pas 44 vitesh karrierë, duke dalë në pension.

Të shumta kanë qenë vlerësimet për të nga krerët e Policisë së Shtetit dhe kolegët.

Ish-drejtori i Përgjithshëm i Policisë, Ahmet Prençi përmes një postimi në rrjetet sociale ka shprehur mirënjohjen për Besnik Bakiun, për kontributin e tij 44-vjeçar në radhet e uniformave blu, personalitetin, besnikërinë dhe ndershmërinë në ushtrimin e detyrës.

Ish-drejtuesi i Policisë së Shtetit mbyll karrierën
Besnik Bakiu, foto e marrë nga profili i Ahmet Prençit

 

"Fjalë Mirënjohjeje për Drejtuesin e Parë, Besnik Bakiu!
Pas 44 vitesh shërbim të pandërprerë në radhët e Policisë së Shtetit, shënohet mbyllja e një kapitulli të ndritur të jetës dhe karrierës së Drejtuesit të Parë, Besnik Bakiu.
Besniku nuk ka qenë thjesht një oficer e drejtues i policisë. Ai ka qenë një shembull i përkushtimit, i ndershmërisë dhe i dashurisë për uniformën që veshi me krenari që në rininë e tij deri sot në ditën e fundit të shërbimit.


Kam pasur fatin ta kem mik të moçëm e të çmuar si dhe bashkëpunëtor në vite sfidash e përjetimesh të forta. Me të kemi ndarë jo vetëm detyrat e shërbimit, por edhe bisedat e gjata për sakrificat e policisë, për çastet delikate dhe për momentet ku guximi dhe përkushtimi vendosnin fatin e njerëzve.
Besniku është dhe do të mbetet një zë i çmuar në jetën publike, një opinionist i drejtë, kritik i ndershëm, njeri me kulturë të gjerë e dashuri të veçantë për letërsinë, historinë, kinemanë dhe artin.


Të përmbyllësh me faqe të bardhë një shërbim 44-vjeçar është një nder i rrallë.
Por nuk është fundi i rrugëtimit të tij publik, është fillimi i një etape të re. Jam i sigurt se zëri i Besnikut do të dëgjohet edhe më fort në mbrojtje të vlerave të policisë, për të cilën ai ka dhënë gjithçka, në mbështetje të përmirësimeve që i duhen këtij institucioni, i cili për mbi tre dekada ka paguar me dhjetëra e dhjetëra jetë çmimin e sigurisë sonë.
Uniformën dhe gradat, ai do t’i ruajë me krenari si relike të çmuara në shtëpi. Por ato do të mbeten gjithmonë të gjalla në mendjen, zemrën dhe fjalën e tij. Sepse Besniku nuk i përket vetëm historisë së policisë, ai është një pjesë e gjallë e saj.


Në këtë ditë të veçantë, unë dhe të gjithë ata që e njohin i urojmë shëndet, jetë të gjatë dhe energji të pashtershme, për të mbetur po ai mbrojtës dinjitoz i kauzave të drejta dhe i flamurit të Policisë së Shtetit.
Respekt e mirënjohje, Besnik Bakiu," shkruan Prençi në statusin e tij në rrjetet sociale./CNA





Lajmet e fundit nga