Ikja e parakohshme nga jeta e ish-deputetit të PD-së/ Kush ishte Gerti Bogdani

18 Shtator 2024, 13:31, Aktualitet CNA

Ikja e parakohshme nga jeta e ish-deputetit të PD-së/ Kush ishte Gerti

Ditën e sotme është ndarë nga jeta ish-deputeti i Partisë Demokratike, Gerti Bogdani. Bogdani u largua nga kjo jetë para kohe, si pasojë e një arresti kardiak. Gerti Bogdani ishte një politikan i njohur për opinionin publik.

Figura e tij lidhet me Partinë Demokratike.

Karriera e Gerti Bogdanit

Gerti Bogdani ishte një politikan i njohur, ish-deputet i Partisë Demokratike në Kuvendin e Shqipërisë.

Bogdani lindi në 7 korrik 1980 në Tiranë. Pasi mbaroi shkollën e mesme “Harry Fultz”, me rezultate të shkëlqyera dhe ‘Medalje Ari’, Gerti Bogdani vijoi studimet e larta në Universitetin Politeknik të New York-ut, ku diplomohet me ‘Nderimet më të Larta’, duke u shpallur edhe fitues i Outstanding Graduate Award - ‘Medalje Ari’.

Bogdani u rikthye më pas në Shqipëri, për të filluar karrierën e tij profesionale në fushën akademike në Universitetin e New York-ut –Tiranë. Ai ishte themelues dhe drejtues i Rrjetit të Studentëve Shqiptarë në Botë.

Karrierën politike e filloi në vitin 2007, kandidoi me Partinë Demokratike për Kryetar të Njësisë Bashkiake nr. 10 Tiranë, garë të cilën e fitoi.

Gjatë kësaj kohe vazhdoi edhe aktivitetin si zëdhënës politik i PD. Në vitin 2009, Gerti Bogdani kandidoi në Zgjedhjet Parlamentare të 28 qershorit 2009, dhe u zgjodh deputeti më i ri në Kuvendin e Shqipërisë. Nga viti 2009 e në vijim, ai vazhdoi aktivitetin e tij si kryetar i Forumit Rinor të Partisë Demokratike.

Në vitin 2011 ai u zgjodh zv/president i "Bashkimit Ndërkombëtar të të Rinjve Demokratë" (International Young Democrat Union - IYDU) e më pas, në janar të vitit 2012, nën/Kryetar.

Në shtator të vitit 2015 u zgjodh Kryetar i IYDU, në Kongresin e zhvilluar në Lisbonë të Portugalisë, duke u bërë kështu politikani i parë shqiptar që mbante një post kaq të lartë në një organizatë ndërkombëtare.

Gerti Bogdani në vitin 2022 garoi në primare brenda PD-së, si kandidat për Bashkinë e Tiranës./ CNA