Gjykata e Korçës vendos "shërbim prove" për Dritson Kurtin

16 Qershor 2025, 16:05, Aktualitet CNA

Gjykata e Korçës vendos "shërbim prove" për

Gjykata e Korçës ka vendosur sot që Dritson Kurti të vuajë një dënim prej 5 vitesh me “shërbim prove”, në bazë të nenit 59 të Kodit Penal. Kjo masë është dhënë pas kërkesës së prokurorisë, e cila ka ngritur një çështje penale kundër tij pasi bashkëjetuesja e tij, e cila në atë kohë ishte e mitur, solli në jetë një fëmijë.

Seanca gjyqësore u zhvillua këtë të hënë në ambientet e Gjykatës së Korçës, ku pala mbrojtëse kërkoi shpalljen e pafajësisë për të akuzuarin. Avokati Enea Cenko e argumentoi mbrojtjen mbi bazën e traditave të komunitetit rom, ku sipas tij, martesat në moshë të hershme janë pjesë e zakoneve dhe mënyrës së jetesës së tyre.

"Sot ishte një vendim për Dritson Kurtin, gjykata e Korçës tashmë ka miratuar kërkesën e organit të akuzës që është shprehur për nenin 59 të kodit penal. E ka dënuar tashmë dhe gjykata e Korçës me një dënim prej 5 vitesh shërbim prove. Duhet theksuar që kjo gjë nuk na kënaq sepse unë vazhdoj të deklaroj që Dritson Kurti është i pafajshëm. Dua ta ritheksoj këtë fakt sepse nuk duhet të kënaqemi me nenin 59, për arsye sepse një pjesë e mirë e këtij komuniteti të nderuar në Shqipëri, që punojnë, e dashurojnë kulturën e njerëzit e mirë, duhet theksuar që këta si persona martohen që në djep sepse lidhen baballarët me njëri tjetrin dhe martojnë fëmijën që të vogël. Kjo është kultura e tyre, duhet ti respektojmë për këtë, gjithsesi ishte një moment i mirë proçedurial që Dritsoni ti bashkohet familjes, të rrijë pranë vajzës së tij të mitur ku ende nuk e ka gëzuar. Duhet theksuar që është një rast që nuk është bërë me kallëzim nga bashkëjetuesja e tij, por është kallëzim i ngritur kryesisht. Edhe ne si mbrojtje kërkuam të aplikohej neni 59 i kodit të proçedurës penale”, tha avokati.

Sipas avokatit, çështja nuk duhet të shihet thjesht si një rast penal, por si një problem më i gjerë social dhe kulturor, që prek komunitetin rom në Shqipëri. Ai apeloi për ndërhyrje në legjislacion, duke kërkuar që institucionet përkatëse dhe komisionet parlamentare të marrin masa për të rishikuar Kodin Penal, në përputhje me konventat ndërkombëtare dhe në konsultim me ndërkombëtarët.

"Do të konsultohem edhe me Dritsonin, në rast që do e ndjekim këtë proçes, unë do ta çoj deri në gjykatën e Strasburgut për të kërkuar pafajësinë e vërtetë sepse ai është i pafajshëm. 70-80% e këtij komuniteti janë në këto kushte. Me këtë rast i bëj thirrje të gjithë institucioneve përkatëse, të ndërmarrin një iniciativë ligjore, komisionet parlamentare të ulen të diskutojnë, duke marrë parasysh dhe konventat europiane, të bashkëbisedojnë me ndërkombëtarët për të rishikuar kodin penal sepse nesër pasnesër mund të ketë të tilla situata sepse kjo është një kauzë", u shpreh avokati Cenko.

Me këtë vendim, Dritson Kurti do të mbetet i lirë, por i detyruar të respektojë kushtet e vendosura nga gjykata për një periudhë pesëvjeçare./ CNA