Gjici përlotet në sallën e gjyqit, tregon se kush e pagoi Alma Kaçin

7 Shkurt 2024, 16:22, Aktualitet CNA

Gjici përlotet në sallën e gjyqit, tregon se kush e pagoi Alma

Safet Gjici

Zbardhet dëshmia e Safet Gjicit në Gjykatën e Posaçme. Gjici u shpreh se përplasja me ish-kreun e Këshillit të Qarkut Kukës Abedin Oruçi ka nisur në vitin 2019, ku i hoqi rrethimin me kangjella hekuri të sheshit para bashkisë sepse nuk ishte pronë e tij.

Ai ka theksuar se nuk ka lejuar Abedin Orucin që të ndërtojë një objekt pa leje në afërsi të liqenit të Kukësit.

Gjici theksoi se Oruçi pagoi Alma Kaçin në shenjë hakmarrje pasi nuk e la të zaptonte pronat e Bashkisë dhe të ndërtonte në mënyrë të paligjshme.

Ai kërkoi pafajësi, sepse sipas tij nuk ka shkelur asnjë ligj.

Dëshmia:

Kam disa gjëra shtesë për të thënë përpos atyre që tha avokati. Përplasja ime me Abedin Orucin ka nisur që në vitin 2019 kur unë në cilësinë e kryetarit të bashkisë i hoqa atij rrethimin me kangjella hekuri të sheshit para bashkisë sepse nuk ishte pronë e tij.

Këtë gjë e provova në bazë të dokumenteve në kadastër që ajo tokë nuk ishte e Abedin Orucit. Bëhet fjalë për 9.3 dynym tokë. Po ashtu unë nuk kam lejuar që Abedin Oruci të ndërtojë një objekt pa leje në afërsi të liqenit të Kukësit.

Po ashtu me Orucin kam pasur edhe përplasje fizike ditën që ka qenë Kukës ambasadorja holandeze. Kam bërë kallëzim për Oruçin, 5 akuza ka pasur në ngarkim të tij në prokurorinë e Kukësit por kanë arritur që t’i pushojnë. Konflikti mes nesh ka qene i hapur dhe ai e paguajti Alma Kaçin në shenjë hakmarrje pse unë nuk e lashë të zaptonte pronat e Bashkisë dhe të ndërtonte në mënyrë të paligjshme.

Ai ka qene 1 vit e ca ne kërkim për çështjen e ndërtimeve pa leje. Abedin Oruçi me ka sulmuar për shkak të detyrës, që nga 2019 pasi unë skam pas asgjë personale kam bërë vetëm detyrën.

Kush me ka dhënë substancë narkotike Alma Kaçi me bashkëpunëtorin e saj pse këtë fakt nuk e heton prokuroria. Pse Alma pasi bëri videon ja dha Abedin Orucit, pse nuk është hetuar ky fakt, ndërkohë që unë hetohem prej 6 muajsh a thua se kam krijuar organizatë terroriste. Ku është premtimi qe i kam bere unë Alma Kaçit për projektin se nga telefoni im nuk doli asgjë ndërkohë qe ajo kishte komuniku me Orucin. Une i thashë shko tek zëvendësi i Almës, por ajo as aty nuk e dorëzoi.

Ne buxhetin e 2023 ne nuk kishim te parashikuar një gjë të tillë fond për qentë. Ata më sulmuan pse nuk i lejova të ndërtojnë pa leje dhe të përvetësojnë token. Unë kam marrë dënimin më të madh. Dënimi është moral u kërkoj falje familjareve të mijë dhe qytetareve të Kukësit (u përlot). Oruci donte që të iki unë dhe të vinte në zbatim projektet e tij, shkoni në Kukës dhe shikoni si i kanë zaptuar pronat e bashkisë. Abedin Oruci ndër vite ka pas 25 çështje penale. Unë kërkoj pafajësi, sepse nuk kam shkel asnjë ligj./CNA