web counter
LEXO PA REKLAMA!

SHKARKO APP

App Store
Google Play

Gazetari rrëfen historinë e blerjeve "online"/ Çfarë i ndodhi verës në Orikum

6 Dhjetor 2022, 15:13, Aktualitet CNA
Gazetari rrëfen historinë e blerjeve "online"/
Agim Xhafka

Ende qesh me historinë e blerjeve on line që më ndodhi verës në Orikum.

-Ta blemë këtë,-më tha gruaja një mbasdite e në tablet më tregoi një raft të bardhë me tri kate.

-Aman mos na ço në dyqane se kemi virusin nëpër këmbë,-iu luta.

-Do e porositim on line. Ja bëj 'sms' me kodin që është te cepi i figurës. Shkruaj një copë ngjyrë të bardhë Orikum dhe mbylle me nr. tënd të cel. Kaq dhe prit.

Pas dy minutash erdhi 'sms'.

-Për dy ditë u vjen pako. Kushton 4.000 lekë dhe 200 transporti.

-Qenka lehtësi e madhe,-i thashë gruas.

-U bëmë si bota, burrë i dashur.

Fiks pas dy ditësh më ra zilja.

-Agimi?

-Po.

-Ku ta sjell pakon?

-Te Market Çimi.

Dola vrik atje dhe prita. Nga një golf i lodhur më erdhi një zë:

-O figurë, ti je Agimi?

-Po.

-Eja vëlla. Na merre. Ta gëzosh.

Rrëmbeu lekët e fryu si era. Hapa pakon në korridor dhe rafti na doli jo i bardhë siç e porosita. Ishte i zi. Mora në cel atë të golfit.

-Lidhu me faqen në internet.., -më tha. -Unë nuk merrem me ankesat.

I shkrojta faqes.

-Nuk kemi të bardhë, -më thanë.

-Do e kthej. Më jepni mbrapsht lekët.

-Jo. Së pari duhet të na vijë malli në Tiranë. Ta shohim është në rregull apo i dëmtuar, pastaj i merr paratë.

U nxeha, por pickova veten.

-Ok, por pas sa ditësh më vijnë lekët?

U bë pauzë matanë. Një çast, më pas më shkruajtën:

-Lekët nuk t’i sjellim në Orikum, do vish t’i marrësh në Tiranë.

Aty më iku petlla. Do harxhoja 50 mijë lekë benzinë që të merrja 40 mijë të vjetra. Ndaj vazhdova paradoksin:

-Ku e keni dyqanin?

-Nuk kemi dyqan. Po do dalë dikush nga firma jonë tek Varri i Bamit.

-E si do e njoh atë? -pyeta.

-Kollaj fare. Personi do mbajë në dorë dy çanta. Majtas të zezë, djathtas kafe.

U vendos qetësi. Nuk dija ç’të thoja. Kur në cel më erdhi 'sms'-ja:

-Po ju çfarë do mbani në duar që t’ju njohim ne?

-Edhe unë do mbaj dy...

-Çfarë dy?

-Dy koqet e mija. Po patë një burrë mbështetur te muri me duart te koqet ai jam unë,-iu shkrojta on line, ama pa gabime.





Lajmet e fundit nga