web counter
LEXO PA REKLAMA!

SHKARKO APP

App Store
Google Play

E fundit!

x

Gazetari Muharrem Meko: Dy eksperienca të hidhura tek "Onkologjiku "

25 Qershor 2024, 20:48, Aktualitet CNA
Gazetari Muharrem Meko: Dy eksperienca të hidhura tek "Onkologjiku
Muharrem Meko, gazetar

Pas shpërthimit të skandalit të mjekëve të Onkologjikut, gazetari Muharrem Meko ka ndarë dy eksperiencat e tij të hidhura tek ky spital.

Gazetari tregon rastin e operacionit të bashkëshortes së tij ku iu desh që ilaçet t’i blinte në farmacitë ngjitur me spitalin pasi drejtoresha lekët e destinuara për ilacet i bënte rrush e kumbulla.

Rasti i dytë ishte vetë gazetari, të cilit ndonëse rezultatet e analizave i kishin dalë në rregull, për “siguri” njëri prej mjekëve e këshillonte të shkonte në Turqi për të bërë një skaner.

Rrëfimi i Muharrem Mekos.

E para, viti 2014...

Pas operacionit nën kujdesin e mjekut Agim Karaj, bashkëshortes time iu rekomanduan 4 seanca kimioterapie. Ok ...do t'i bënim pa asnjë diskutim!

Tek shefja e Pavionit Dr.Dhurata Koroveshi dhe përgjegjësja e repartit të Kimios, Dr.Flutura, vërtetë gjetëmdy engjëj të vërtetë, por "...kishin mungesë të kimikateve të duhura...", çka na detyronte t'i kërkonim në farmacitë ngjitur me murin e spitalit!

Një ditë të bukur Dr.Agimi më thotë: -O miku im...ti shkon e blen ilaçet që duhet të të sigurojë shteti, sepse zonja drejtoreshë, lekët e destinuara për këtë punë, po i bën rrush e kumbulla.

E aty për aty artikuloi shifrën prej rreth 500 milionë që kishin "ndërruar destinacion", nga medikamente për të sëmurët, në zyra luksoze për administratën, medemek!

Dhe shtoi më tej, kur zyrat e Q.S.U.T, ndoshta ishin më të mira nga të çdo institucioni, në Tiranë!

Pas ca muajsh drejtoresha u gradua lart, lart, madje, atë ditën e "gradimit" të saj i telefonoj doktorit, që ta uroja, por Dr. Gimi menjëherë e kuptoi arsyen e vërtetë dhe ma ktheu:

-Muharrem i dashur, po iki në Kanada...!

Për të vazhduar përmes një ofshame të dhimbshme e tepër dëshpëruese e që s'ishte e vështirë për ta kuptuar edhe së largu,vetëm ky vend s'bëhet!

Eksperienca e dytë, viti 2022!

Pas operacionit dhe qëndrimit tim rreth një muaj në spital, dola për t'u ndjekur në vijimësi nën kontrollin e mjekëve në Korçë, ndërkohe që me Dr.Aurel Jankon lidhjet ishin permanente!

Pas mëse 3 muajsh shkova në Tiranë, ku Dr.Reli në një konsultë me kolegë të tij dhe një kontrolli të imët me paisje 4HD, do të më drejtonte për tek Onkologjiku!

- Atje po të pret një kolegia ime- më tha ai  ...është shkolluar në një nga universitetet më të mira të Nju Yorkut, madje autoritetet e atjeshme  kishin dashur ta mbanin mjeke në Spitalin e Onkologjikut të Nju Jorkut, një nga më të mirët e botës por që vajza e kishte refuzuar sepse ëndërronte  t'i shërbente atdheut të saj, Shqipërisë!

-Analizat të kanë dalë shumë mirë, -më thotë Doktoresha e re, por sidoqoftë do të shkosh t'iu nënshtrohesh edhe konsultave të specializuara, këtu në " Onkologjiku" dhe pastaj do më vish këtu!

Kështu bëra. Komisioni i parë, një mjek me emrin Blendi Kreka, djali i një mësuesi nga Korça, të cilin unë e njihja mirë, si i ati edhe i biri shumë, shumë njerëzor!

Ai pasi i kontrolloi të gjitha rekomandimet dhe lexoi me kujdes analizat përkatëse u drejtohet edhe anëtarëve të tjerë të komisionit: -Paska kaluar gjithçka...ka qenë veç një diçka e vogël, por gjithësesi, unë mendoj të bësh një kurë me katër gjilpëra (secila prej tyre zëvendësonte një seancë kimioterapie).

Komisioni i dytë.

Në krye të tavolinës,një i njohuri im, madje i fëmijërisë time, por që po bënte sikur s'më njihte!

-Që të jesh fare, fare i sigurt, më drejtohet ai rëndë-rëndë, mirë është të shkosh në Turqi, të bësh një Pet Skaner atje!

- Po sikur ka edhe këtu Pet Skaner, mor doktor, ia kthej unë.

Heshti për një çast e pa i ngritur sytë,por i përqëndruar mbi flet-rekomandimin më thotë: - Unë për të mirën tënde, po të them dhe vijonte, -bileta kushton 900 EURO fjetja, ushqimin e ke të paguar etj etj!

-Hajde ikim-i them Lencës, ndërkohë që si me porosi përballë na shfaqet Doktor, Artan Bodeci, me të cilin njohjet kishin tjetër karakter, ai, sapo më pa erdhi drejt meje e më pyet se, çfarë kam?

Ja tregoj rekomandimin  dhe i tregoj se "X" mjek më tha të shkoja për në Turqi.

Ma jep rekomandimin, më thotë Dr Tani, të shikojme edhe këtë të "rrezeve"  se çdo të na thotë, e me të në dorë hyri në një zyrë aty ngjitur. As pesë minuta e ai del që atje me kartën e rekomandimit në dorë. Ky po na rekomandon që të bësh edhe disa seanca me rreze, mundësisht tek Hygeja ose edhe tek Amerikani, -më thotë ai!

- Zot na ruaj, -i them...po mua Dr .Fatjona më tha se me këtë diagnozë...e me këto analiza nuk ke nevojë për rreze...!?

U kthyem përsëri tek doktoresha dhe i tregova gjithçka. Ajo më pa drejt e në fytyrë e më kthehet: - Muharrem, Onkologjiku është kthyer në një han pa porta, ku s'merr vesh i pari të dytin, ku sidomos këta dy doktorë që po më thua, por që vetëm doktorë s'janë, janë bërë kasapët e Spitalit!

Ashtu e revoltuar tej mase u çua nga karrigia e mu drejtua: - Ai i delenxhiu i Turqisë, është lidhur me kompanitë e transportit ajror e ky maskarai tjetër, me Spitalet private!

- Nuk do të bësh asgjë tjetër përveçse atyre katër gjilpërave që të ka rekomanduar doktor Bledi,-ma preu shkurt.

Pas disa muajsh, mora vesh se ajo vajzë që mua në atë takim m'u duk si një meteor në qiellin e mjekësisë shqiptare, ishte larguar drejt Italisë. I gjeta numurin e telefonit, e mora për ta falenderuar!

Ajo gati, gati e mallëngjyer më përsëriste.

-Ika Muharrem...ika, sepse s'mund të përballoja unë atë gjendje katastrofike ku e kanë zhytur të papërgjegjshmit, Mjekësinë Shqiptare!/ CNA





Lajmet e fundit nga