web counter
LEXO PA REKLAMA!

SHKARKO APP

App Store
Google Play

E fundit!

x

Fshati Lubonjë i Korçës në alarm/ Dëmtimet në argjinaturë vënë në rrezik banesat dhe banorët

25 Nëntor 2025, 11:52, Aktualitet CNA

Fshati Lubonjë i Korçës në alarm/ Dëmtimet në

Në fshatin Lubonjë të Korçës, banorët kanë ngritur shqetësimin për një situatë që po përshkallëzohet pas reshjeve të fundit. Sipas tyre, përmbytjet janë pasojë e punimeve të pakontrolluara dhe me cilësi të dobët në argjinaturën e lumit, të kryera vetëm një muaj më parë.

Kryetari i fshatit, Albert Hima, nënvizon se ndërhyrjet në shtratin e lumit janë realizuar pa standardet e duhura dhe pa mbikëqyrje teknike. Ai shprehet se dëmtimet kanë rrezikuar rrugën kryesore që lidh dy lagjet e fshatit dhe se nëse lumi del nga shtrati, Lubonja mund të përballet me dëme të konsiderueshme, duke qenë se aty jetojnë rreth 75 familje me 350 banorë.

"Në Lubonjë për shkak të reshjeve të mëdha ka ndodhur një përmbytje. Kjo ka ardhur si shkak i një firme që para 20 ditësh ka mbaruar punimet në pjesën e lumit, nuk ka bërë punime cilësore dhe i ka bërë pa asnjë kontroll. Kam ngritur shqetësimet te kryetari i bashkisë dhe drejtori i urbanistikës, por më kanë thënë që nuk ke asnjë të drejtë të merresh me këtë punë. Është prishur komplet lumi, rrezikohet rruga kryesore e fshatit që lidh të dyja lagjet. Banorëve u ndikon se po doli lumi prish gjysmën e fshatit. Në Lubonjë janë rreth 75 familje me 350 banorë”, tha Albert Hima, kryetar i fshatit Lubonjë.

Banorët thonë se investimi i sapopërfunduar është shkatërruar me prurjet e para të lumit, çka sipas tyre tregon mangësi serioze në projekt dhe në mënyrën si është kryer puna. Ata shprehen se argjinatura është çarë në disa segmente dhe se shtëpitë ndodhen nën rrezik të vazhdueshëm. Në disa raste, uji ka hyrë në banesa dhe rrjedha ka marrë edhe bagëti, duke shkaktuar humbje për familjet.

"Projekti që u bë këtu u bë pa inxhinier dhe jashtë standardeve. Ka një muaj që mbaruan punimet dhe me prurjet e para të lumit e shkatërroi gjithë investimin. Nuk dihet kush mban përgjegjësi për këtë punë, por nuk është normale që me prurjen e parë të prishet argjinatura e lumit. Ndihemi të rrezikuar sepse është çarë e gjithë argjinatura dhe nëse ndodh e njëjta situatë me reshjet mund të përmbytë të gjitha banesat. Uji ka hyrë në banesa, madje rrjedha e ujit ka marrë edhe disa bagëti dhe fshati u rrezikua jashtë mase”, tha banori Kudret Xhixho.

Një tjetër banor është shprehur se argjinatura e lumit ishte e një cilësie shumë të dobët, ndërsa u bën thirrje autoriteteve të vënë para përgjegjësisë ata që kanë bërë punimet.  

"Ka sjellë problematikë pasi të gjitha ujërat e maleve janë bashkuar dhe kanë ardhur në fshat. U punua me argjinaturën e lumit me një cilësi shumë të ulët. Rreziku është të na përmbytë banesat. Rrezikohen edhe bagëtitë. Njërit prej banorëve rrjedha e lumit i mori 7 krerë. Shteti të vërë dorë, t'i vërë para përgjegjësisë ata që bënë punimet", tha banori Kadri Turani.

Sipas tyre, punimet në lumë janë kryer pa bazat minimale teknike, me materiale të pamjaftueshme dhe pa mbushjen e nevojshme anësore. Në terren përmendet se pritja duhej të ishte ndërtuar më lart, në pjesën pranë centralit, për të shmangur rrëshqitjen e gurëve dhe materialeve drejt lumit.

"Punimet në lumë janë bërë me cilësi të dobët, pa mbushje anësore, me 10 pont çimento. Prita duhej bërë në krye të fshatit, afër centralit që kur të vinin gurë nga lart të mos përfundonin në lumë”, u shpreh banori Shkëlqim Murati.

Banorët kërkojnë që institucionet të ndërhyjnë menjëherë, të hetojnë përgjegjësitë dhe të garantojnë një zgjidhje të qëndrueshme, për të shmangur rrezikun e një përmbytjeje tjetër që mund të dëmtojë banesat, tokat dhe bagëtitë e tyre. /CNA





Lajmet e fundit nga