E fundit!

21:14 Politikë

Nga “ethet” e garës, te misioni politik/ Flasin 3 nënkryetarët e sapozgjedhur të PD-së

Zgjedhjet e zhvillura dje në Këshillin Kombëtar të Partisë...

Çështja "Zvërneci"/ Kreu i Unionit Turistik Shqiptar: Mirëqenia vjen nga zhvillimi

2 Qershor 2026, 16:10, Aktualitet CNA

Çështja "Zvërneci"/ Kreu i Unionit Turistik Shqiptar:

Kryetari i Unionit Turistik Shqipar, Rrahman Kasa, ka bërë një reagim lidhur me debatet për çështjen e investimeve në Zvërnec dhe protestat që po zhvillohen.

Kasa shkruan se pakënaqësitë e qytetarëve ndaj një investimi me vlerë më shumë se 4 miliardë euro, nuk ndihmojnë në zhvillimin e turizmit dhe ekonomisë në vend.

Po ashtu thekson se ky reagim i qytetarëve u shërben vendeve fqinje që nuk duan zhvillimin e Shqipërisë dhe duan që investitorët t’i tërheqin në vendet e tyre.

Më tej shkruan se ardhja e brandeve si “Mandarine Oriental”, “Aman” apo “Atlantis” rrisin emrin e Shqipërisë në arenën ndërkombëtare. Ai thekson se Shqipëria nuk mund të refuzojë investime strategjike që rritin konkurrueshmërinë e turizmit në Mesdhe dhe sigurojnë mbi 10 mijë vende pune.

Kreu i UTSH thotë se qytetarët që kanë pretendime për mbivendosje të pronës duhet t’u drejtohet gjykatave për të vërtetuar deklarimet e tyre.

Lidhur me ata që protestojnë për mbrojtjen e mjedisit, Kasa shprehet se turizmi modern ndërkombëtar bazohet pikërisht te ruajtja e natyrës, biodiversitetit dhe trashëgimisë kulturore dhe në respektim të çdo standardi mjedisor.

Reagimi i plotë:

Në pozicionin e Kryetarit të Unionit Turistik Shqiptar, mendoj se pakënaqësia dhe protestat e qytetarëve shqiptarë kundër një investimi mbi 4 miliardë euro që do të bëhet në sektorin e turizmit, qoftë edhe për pretendimet për mbivendosje të pronës në Zvërnec, apo të disa ambientalistëve që pretendojnë për zhdukjen e disa gjallesave të vogla ujore, nuk mendoj se i shërben zhvillimit të turizmit dhe të ekonomisë shqiptare. Përkundrazi, mendoj se ju shërben vendeve kufitare që nuk duan zhvillimin tonë dhe padyshim që, nëpërmjet këtyre manipulimeve dhe organizimeve të nëndheshme, duan që investitorët t’i tërheqin në vendet e tyre.

Investime të këtij niveli, të cilët sjellin në vendin tonë brande si Mandarine Oriental, Aman apo Atlantis, disa prej të cilëve nuk kanë hyrë akoma në Europë, rrisin emrin e Shqipërisë në arenën ndërkombëtare, rrisin vlerën e pronës, krijojnë mundësi për sipërmarrjet vendase dhe forcojnë pozicionin ndërkombëtar të destinacionit turistik të Shqipërisë.

Pa diskutim që ne respektojmë të drejtën e çdo qytetari për të protestuar dhe kërkojmë që çdo projekt të zbatohet me standardet më të larta mjedisore dhe ligjore. Por, në të njëjtën kohë, Shqipëria nuk mund të refuzojë investime strategjike që rritin konkurrueshmërinë e turizmit tonë në Mesdhe dhe sigurojnë mbi 10 mijë vende pune, duke e kthyer zonën në një nga motorët më të rëndësishëm ekonomikë të vendit.

Është e rëndësishme që debati për investimin në Zvërnec të bazohet mbi të vërteta, mbi fakte, transparencë dhe interesin afatgjatë të Shqipërisë, jo mbi emocione apo dezinformim.

Nga deklarimet publike, projekti zhvillohet mbi prona private të blera në mënyrë të ligjshme, por që nga disa qytetarë ka pretendime për mbivendosje të pronës. Kjo kategori, e cila ka këto pretendime, duhet t’u drejtohet gjykatave për të vërtetuar pretendimet e tyre dhe t’i kërkojnë garanci shtetit që, në rast se gjykata ju jep të drejtë, të dalë garant që t’i shpërblejë për pronën me çmimin e shitjes që kanë përfituar pronarët e paligjshëm dhe jo të kërkojnë ndihmë nga disa qarqe politike greke, të cilët, në vend që të kontribuojnë për rritjen e miqësisë ndërmjet dy popujve që jetojnë pranë njëri-tjetrit prej mijëra vitesh, bëjnë të kundërtën duke deklaruar se po grabiten tokat e minoritarëve grekë në Vlorë dhe nxisin disa emigrantë mercenarë që i organizojnë me autobusë për të protestuar, gjoja në mbrojtje të pronave minoritare.

Edhe për sa i përket asaj kategorie që proteston për mbrojtjen e mjedisit dhe kundërshtojnë në emër të kësaj kauze, duhet ta kenë parasysh se turizmi modern ndërkombëtar bazohet pikërisht te ruajtja e natyrës, biodiversitetit dhe trashëgimisë kulturore, respektim të çdo standardi mjedisor, por jo bllokim apriori të investimeve që mund të transformojnë pozitivisht ekonominë kombëtare.

Zvërneci është një pasuri e jashtëzakonshme e Shqipërisë. Sfida jonë nuk është ta lëmë të pazhvilluar, sepse në qoftë se do e konsiderojmë Shqipërinë vetëm për bukuritë e saj, nga do t’i prodhojmë të mirat materiale, sepse mirëqenia vjen nga zhvillimi, por duhet ta zhvillojmë me përgjegjësi, profesionalizëm dhe vizion afatgjatë, në mënyrë që brezat e ardhshëm të trashëgojnë një destinacion më të fortë ekonomikisht, më të vizituar dhe më të vlerësuar në hartën turistike të Mesdheut. /CNA