Çela në Kuvend: Në 2024 ka pasur rritje të numrit të ekstradimeve nga Shqipëria për jashtë vendit

27 Tetor 2025, 13:31, Aktualitet CNA

Çela në Kuvend: Në 2024 ka pasur rritje të numrit të

Prokurori i Përgjithshëm, Olsian Çela, po raporton në seancën e sotme plenare lidhur me gjendjen e kriminalitetit në vend për vitin 2024. Çela është shprehur se Prokuroria e Përgjithshme ka vijuar me punën për rritjen e eficiencës në bashkëpunimin me autoritetet gjyqësore të huaja në fushën penale.

Kryeprokurori ka folur edhe për marrëveshjet dypalëshe të ekstradimit, ku ka bërë me dije se Shqipëria ka marrëveshje dypalëshe ekstradimi me SHBA-në, Mbretërinë e Bashkuar, Italinë, Spanjën dhe Kosovën.

Ai është shprehur se gjithashtu vitin e kaluar ka vijuar edhe zbatimi i Marrëveshjes së Bashkëpunimit me Eurojust, ku tha se volumi i çështjeve të ndjekura në Eurojust ishte 5% më lart se në 2023.

“Prokuroria e Përgjithshme ka vijuar punën për rritjen e eficiencës në bashkëpunimin me autoritetet gjyqësore të huaja në fushën penale. Theksojmë këtu intensifikimin e kontakteve me autoritetet belge dhe holandeze për goditjen e kriminalitetit, me theksin te pastrimi i produkteve të veprës penale dhe krimet e rënda. Në këtë kuadër, në muajin nëntor 2024, Prokurori i Përgjithshëm nënshkroi një marrëveshje bashkëpunimi me Prokuroren e Përgjithshme të Mbretërisë së Belgjikës në këto fusha.

Të dhënat kryesore të bashkëpunimit gjyqësor ndërkombëtar të administruara në sistemin elektronik IMPRO për vitin 2024 tregojnë rritje të numrit të ekstradimeve nga Shqipëria për jashtë vendit me 38 % (nga 99 në 137), rritje të numrit të letërporosive nga jashtë me 39 % (nga 431 në 599), rritje të numrit të letërporosive për jashtë me 10 % (nga 491 në 539), rritje të njohjeve të vendimeve penale të ardhura nga jashtë me 6 % (nga 33 në 35). Vlen të theksohet se megjithë vështirësitë që kemi hasur për shkak të vakancave të theksuara në organikë, përqindja e ekzekutimit të letërporosive nga ana jonë është dukshëm me lart se ai i autoriteteve të huaja (36.5% / 23.2%), çka tregon për prioritetin që ka pasur për prokurorinë bashkëpunimi ndërkombëtar.

Gjithashtu vlerësojmë të theksojmë rëndësinë që kanë pasur ndryshimet legjislative të viteve të fundit, përfshirë edhe marrëveshjet dypalëshe të ekstradimit. Aktualisht Shqipëria ka marrëveshje dypalëshe ekstradimi (në të cilat parashikohet ekstradimi i shtetasve respektivë) me Shtetet e Bashkuara të Amerikës, Mbretërinë e Bashkuar, Italinë, Spanjën dhe Kosovën. Vlen të përmendim se në zbatim të marrëveshjes dypalëshe aktualisht kemi 20 praktika aktive të transferimit të të dënuarve nga Mbretëria e Bashkuar në Shqipëri.

Prokurori i Përgjithshëm në cilësinë e përfaqësuesit të autoritetit kompetent ka vijuar zbatimin e Marrëveshjes së Bashkëpunimit me Eurojust, nëpërmjet veprimtarisë së Prokurorit Ndërlidhës të Shqipërisë në Eurojust, Referuar të dhënave nga Zyra e Prokurorit Ndërlidhës Shqiptar në Eurojust, në vitin 2024, volumi i çështjeve të ndjekura në Eurojust ishte 247 çështje, 5% më lart se në 2023. Zyra Shqiptare në Eurojust mbështeti krijimin dhe vijimin e 24 skuadrave të përbashkëta hetimore, ku 6 skuadra hetimore janë krijuar gjatë vitit 2024, Autoritetet shqiptare kanë marrë pjesë në 3 Qendra Koordinimi të Ditëve të Aksionit dhe 19 mbledhje të koordinuara bilaterale dhe multilaterale”, është shprehur ai. /CNA