web counter
LEXO PA REKLAMA!

SHKARKO APP

App Store
Google Play

E fundit!

x

Kryeprokurori Çela në Kuvend: Rreth 25 mijë çështje të përfunduara në vitin 2024, janë dënuar 10 mijë të pandehur

27 Tetor 2025, 13:27, Aktualitet CNA

Kryeprokurori Çela në Kuvend: Rreth 25 mijë çështje

Kryeprokurori Olsian Çela po raporton këtë të hënë në Kuvend mbi veprimtarinë e Prokurorisë së Përgjithshme gjatë vitit 2024.  

Në fjalën e tij, Çela u ndal gjerësisht te raportimi për çështjet hetimore dhe eficienën e tyre.

Çela ndau edhe shifra, ku theksoi përfundimin e rreth 25 mijë çështjeve, dënimin e 10 mijë të pandehurve, është kërkuar ‘arresti në burg’ ndaj 3078 personave dhe ‘detyrimi për paraqitje’ ndaj 2611 personave.

Gjatë vitit 2024 janë ekzekutuar 5201 vendime, ndërsa kanë mbetur pa u ekzekutuar 1090 vendime.

Pjesë nga raportimi:

Gjatë vitit 2024 janë përfunduar 24591 çështje që përbën rritje prej 5 % të çështjeve të përfunduara krahasuar me vitin 2023, prej të cilave: 36,72 % janë dërguar për gjykim (janë dërguar në gjykatë 9030 çështje me akuzë ndaj 10759 të pandehurve), 33,89 % janë pushuar, 26,91 % janë pezulluar. Ka një tendencë të rritjes së çështjeve të pushuara në krahasim me vitin paraardhës për shkak të zbatimit të ligjit për amnistinë.

Janë paraqitur në gjykatë 13062 kërkesa lidhur me masat e sigurimit personal. Nga ana tjetër, të dhënat statistikore mbi kërkesat e prokurorëve për caktimin e masave të sigurimit tregojnë se për vitin 2024, për rreth 60 % të të pandehurve të regjistruar (ose për rreth 34 % të personave në hetim) është kërkuar caktimi i një mase sigurimi shtrënguese. Ndërkohë, rezulton se afërsisht 59.5% e kërkesave lidhen me caktimin e një mase sigurimi me arrest, masa këto të kërkuara për pothuaj 36% të të pandehurve regjistruar (ose rreth 20% të personave në hetim). Në vitin 2023, është kërkuar caktimi i një mase sigurimi shtrënguese për mbi 55 % të të pandehurve të regjistruar (ose 32% të personave në hetim). Ndërkohë, rezulton se rreth 59,3% e kërkesave lidhet me caktimin e një mase sigurimi me arrest, masë e kërkuar për 32,8 % të të pandehurve regjistruar (ose për 19 % të të personave në hetim).

Vetëm në 31 raste është kërkuar masa e garancisë pasurore, ndërkohë që është kërkuar arresti në burg ndaj 3078 personave dhe detyrimi për paraqitje ndaj 2611 personave. Nga ana e Prokurorit të Përgjithshëm, në frymën e vendimit të GJEDNJ (Hysa k. Shqipërisë), u miratua në muajin korrik 2024 një udhëzim i përgjithshëm në lidhje me masat e sigurimit, nisur nga nevoja për një përdorim më të kujdesshëm dhe proporcional të tyre, sidomos në lidhje me “arrestin në burg”, dhe një aplikim më të gjerë të masave të tjera. Me gjithë këtë udhëzim, nuk konstatohet ende një reflektim nga ana e prokurorëve, edhe pse çështja është trajtuar gjerësisht edhe në të gjitha analizat vjetore, por gjithsesi prirjet për ndryshimin e mundshëm të tendencës priten të duken me qartë në vitin 2025 për shkak të kohës relativisht të shkurtër në 2024.

Sa u përket kërkesave për miratim të urdhrit penal, vazhdoi një tendencë në ulje, me vetëm 91 të tilla, ndërsa u rritën ndjeshëm kërkesat për miratimin e marrëveshjeve të fajësisë dhe gjykimit të drejtpërdrejtë, përkatësisht 183 dhe 333 raste.

Eficienca në kërkesat për gjykim dhe përfaqësimin e çështjes/akuzës në gjykatë

Gjatë vitit 2024 nga prokuroritë pranë Gjykatës së Shkallës së Parë është ngritur dhe përfaqësuar akuza në gjykatë në emër të shtetit shqiptar për 9052 procedime penale me 10781 të pandehur.

Në lidhje me vendimet e gjykatës, nga të dhënat statistikore rezulton se në vitin 2024 janë dënuar 10001 të pandehur që krahasuar me vitin 2023 përbën rritje rritje 37,87 % të numrit të pandehurve të dënuar dhe për 265 të pandehur është dhënë vendim për deklarimin të pafajshëm.

Gjatë vitit 2024 janë ekzekutuar 5201 vendime, ndërsa kanë mbetur pa u ekzekutuar 1090 vendime. Numri i vendimeve sipas llojit të tyre të mbetura pa ekzekutuar është 298 vendime me burgim, 220 vendime për dënime me gjobë dhe 572 dënime alternative./CNA





Lajmet e fundit nga